Almaty oblysynyń Malaısary aýylyndaǵy petroglıfter joıylyp bara jatqandyǵy týraly másele taǵy da talqyǵa tústi, dep habarlaıdy Egemen.kz. Bul joly Azattyq ryhy basylymy másele kóterip otyr.
Arqarly asýyndaǵy jaqpar tastardyń birazy qıyrshyq tas shyǵaratyn zaýytta úgitilip ketti, dep Kerbulaq aýdanyna qarasty Malaısary aýylynyń turǵyndary dabyl qaǵýda.
Kóneden syr shertetin sýretterden qol úzip qalamyz dep alańdaǵan aýyl turǵyndarynyń biri Qojaqan Úderbaı. Onyń aıtýynsha, tasqa qashap salynǵan sýretterdi tas óńdeıtin kásiporyndar oıyp-opyryp áketip jatyr.
Al jergilikti bılik qundy derekke toly aımaqta kásiporyndar zańdy túrde jumys istep jatqanyn aıtady.
«Sarybastaý aýyldyq okrýgine qarasty saıy óńdeýge berilgen jerler. Sol jaq sheti qıyrshyq tas zaýytyna, oń jaǵynda «Tatarka ltd» fırmasy istep jatyr. Sýreti bar bolǵanymen zerttelmegendikten, qolǵa alynbaǵandyqtan eshqandaı shekteý joq. Olar zańdy túrde memlekettik aktisin alyp, salyǵyn tólep, jumys istep jatyr», deıdi Kerbulaq aýdanyna qarasty Sarybastaý aýyldyq okrýginiń ákimi Qaırat Sultanbekov.
Tańbaly tastardyń jaı-kúıi ásirese áleýmettik jelide qyzý talqylanyp, alańdaýshylyq bildirgenderdiń qatary kún sanap artyp keledi.
Malaısary petroglıfteri osylaı qaraýsyz jatsa bolashaqta múldem joǵalyp ketý qaýpi bar. Bıik qyrattar men kóz jetpes silemderi tunǵan tarıh. 2017 jyly arheolog Alekseı Marıashev bastaǵan ǵalymdar Arqarly asýyndaǵy tarıhı tastarǵa nazar aýdarǵan. Tarıhı sýretter qola nemese temir dáýirine tán ekenin aıtyp, óńirge keshendi zertteý jumystaryn júrgizý qajet ekenin aıtqan. Biraq, tarıhtan buryn tabys tabýdy mise tutqan óńir kásipkerleri tarıhı oryndy ondaǵan jyl boıy tóńkerip keledi.
«Arqarly tas» JShS basshysy 15 jyldan beri tastan tabys tabýdy bastaǵandaryn aıtady. Qazirgi kásipker kezinde Kerbulaq aýdanynyń ákimi de bolǵan. Almaty oblysyn Serik Úmbetov basqaryp turǵanda 2006 jyly taýdan 230 gektardaı jerdi satyp alǵan. Áli kúnge deıin jerge tóseıtin taqtatastar shyǵaryp satady. Eks-ákim 15 jyldyń ishinde esepsiz mólsherdegi tas óndirgenin aıtady. Zaýyttan óndirilgen tasty aýyr júk kólikterimen ǵana emes, temir jolmen de úzdiksiz jóneltip otyrady.