Seısenbiden sársenbige qaraǵan túni Eýropa birinshiliginde F tobynda óner kórsetetin komandalardyń oıyndaryn tamashaladyq. Býdapeshte Majarstan men Portýgalııa quramalary kúsh synassa, Mıýnhende Germanııa men Fransııanyń fýtbolshylary sheberlik baıqasty. Bul kezdesýlerdiń ekeýi de kópshilik kóńilinen shyqty degen oıdamyz, dep jazady Egemen.kz.
Qazirgi kezde pandemııaǵa baılanysty álemniń kóptegen stadıondarynda kórermender sanynyna shekteý qoıylǵany belgili. Alaıda bul áńgimeniń Majarstanǵa esh qatysy joq. О́z otandastarynyń oıynyn tamashalaý úshin sol keshte Býdapeshtegi «Pýshkash Arenaǵa» 55 662 kórermen jınaldy. Buǵan deıin olar ózara 13 márte kezdesip, toǵyz kezdesýde Pırneı túbeginiń túlekteri basym bolǵan eken. Taǵy tórt básekede teń esep tirkeldi. Iаǵnı, majarstandyqtar Portýgalııa quramasyn birde-bir ret jeńe almapty. Bul jaıttyń barlyǵy jankúıerlerdiń jadynda. Sol sebepti de stadıon toly kórermen matchtyń basynan aıaǵyna deıin aıǵaıǵa basyp, jergilikti fýtbolshylarǵa barynsha qoldaý kórsetti. Solardyń demeýiniń arqasynda alań ıeleri 83 mınýt boıy Eýropa chempıondarynyń qarqynyna toıtarys berip qana qoımaı, ózderi de ara-tura qaýipti shabýyldar uıymdastyrdy. Tipten, olar alǵashqy bolyp esep te ashty. Alaıda 80-mınýtta Sabolch Shıonniń soqqan goly esepke alynbady. Offsaıd!
Tek sodan keıin baryp qana portýgalııalyqtar es jıdi. Birden eki oıynshysyn almastyrǵan qonaqtar 84-mınýtta qarsylastarynyń qaqpa kiltin tapty. Rafael Gerreırýdiń soqqan doby qorǵaýshylardyń birine tıip, óz baǵytyn ózgertti – 0:1. Sodan keıin-aq jergilikti fýtbolshylardyń saly sýǵa ketti. 86-mınýtta olar óz aıyp alańynda ereje buzdy. Krıshtıaný Ronaldý 11 metrlik núkteden múlt ketken joq – 0:2. Básekeniń aıaqtalýyna sanaýly sekýndtar qalǵanda Ronaldý taǵy bir márte nysanany dál kózdedi – 0:3.
Osylaısha, Portýgalııa quramasy bıylǵy «Eýro» dodasyndaǵy alǵashqy úsh upaıyna qol jetkizdi. Al Krıshtıaný Ronaldý bolsa, úsh birdeı rekordty jańartty. Birinshisi, ol qart qurlyqtyń basty dop dodasynda besinshi márte boı kórsetti. Ekinshisi, álem jáne Eýropa chempıonattaryn qos alǵanda, Krısh 39 ret jasyl alańǵa shyqty. Buǵan deıingi eń úzdik kórsetkish Bastıan Shvaınshtaıgerge tıesili edi. Germanııa quramasynyń jartylaı qorǵaýshysy 38 oıynǵa qatysty. Úshinshisi, Portýgalııanyń juldyzy «Evro» dodalarynda 11 ret nysany dál kózdep, Fransııanyń surmergeni Mıshel Platınıdi basyp ozdy.
Mıýnhendegi «Allıans Arenada» sońǵy eki álem chempıonatynda bas júldeni oljalaǵan qos komanda – Germanııa men Fransııa kúsh synasty. Alǵashqysynyń 2014 jyly Brazılııada baǵy jansa, ekinshisi 2018 jyly Reseıde qarsylas shaq keltirmegen edi. Bul komandalardyń ekeýi de 4-3-3 shemasyn ustandy.
Kezdesýdiń alǵashqy 10 mınýty alma-kezek shabýylmen ótkenimen, odan keıin fransýzdar oıyn tizginin birte-birte óz qoldaryna aldy. Nátıje kóp kúttirgen joq. 20-mınýtta Dıde Desham shákirtteriniń uıymdastyrǵan jaqsy bir kombınasııasynan keıin dop qaqpa torynan tabyldy. Qarsy jaqtan tóngen qaýiptiń betin qaıtarmaq bolǵan Mats Hýmmels avtogol avtory atandy.
Ekinshi taımda da eki komandanyń da gol soǵýlaryna tamasha múmkindikteri boldy. Osy oraıda, alań ıelerine qaraǵanda Fransııa quramasy áldeqaıda shıraq qımyldap, kóbirek qaýip tóndirgenin aıta ketken abzal. Ásirese, Adrıan Rabo. Kılıan Mbappe jáne Karım Benzemanyń esepti eseleýge tamasha múmkindikteri boldy. Biraq olardyń baǵyttaǵan doby birde baǵanaǵa tıse, endi birde «oıynnan tys qaldyń» dep tóreshi soǵylǵan goldy esepke almady. Sóıtip, qos myqtynyń tartysy Fransııa quramasynyń jeńisimen aıaqtaldy – 1:0: