Qoǵamda tabys tabamyn dep alaıaqtarǵa aldanyp, qoldaǵy baryn qarjy pıramıdasyna quıǵandar kóbeıip barady. Qyzylorda qalalyq Polısııa basqarmasyna qala turǵyndary «Befree» atty qarjy pıramıdasyna jem bolǵandary jóninde aryzdanǵan, dep habarlaıdy Egemen.kz.
Bul uıym 2019 jyldyń qazan aıynan beri jumys isteı bastapty. Belgisiz bireýler «WhatsApp» jelisi arqyly «Befree» tobyn ashyp, ınvestısııalyq pıramıda quryp, oǵan salymshy bolǵandardy 2 apta ishinde 50 paıyzdyq ústememen paıda tabatynyna sendirgen. Az ýaqyt ishinde uıymǵa uzyn-sany 296 adam salymshy retinde tirkelip úlgeripti.
Polıseıler dereginshe, jábirlenýshi retinde aryzdanǵan 21 adamǵa kelgen materıaldyq shyǵyn 22 mıllıonnan teńgeden asqan.
Osyǵan oraı polıseılerdiń jedel áreketterimen, tergep-tekserý jumystarynyń nátıjesinde qala ortalyǵynyń turǵyny ustalyp, onyń bul iske qatysty taǵy da eki sybaılasy anyqtalypty. Olarǵa qatysty dáleldemeler jınaqtalyp kúdikti qatarynda tanylǵan.
Qylmystyq is boıynsha Qazaqstan Respýblıkasynyń Qylmystyq kodeksiniń 217-babynyń 3-bóliginiń 2-tarmaǵymen (Qarjylyq (ınvestısııalyq) pıramıda qurý jáne oǵan basshylyq etý, asa iri mólsherde aqshany nemese ózge múlikti tarta otyryp jasalǵan) sotqa deıingi tergep-tekserý amaldary júrgizildi.
Qyzylorda qalalyq sotynyń sheshimimen aıyptalýshylardyń árqaısysyn 5 jylǵa bas bostandyǵynan aıyrý týraly sheshim shyqty.