Almaty qalasynda Prezıdenttiń kómekshisi – Qaýipsizdik Keńesiniń hatshysy Áset Isekeshevtiń tóraǵalyǵymen Memleket basshysynyń tapsyrmalaryn iske asyrý – qylmystyq prosestiń úsh býyndy modeline kóshý jáne polısııanyń servıstik modelin engizý jónindegi jumys keńesi ótti.
Keńes barysynda Qaýipsizdik Keńesiniń hatshysy Memleket basshysynyń Qazaqstan halqyna Joldaýynda qoıylǵan quqyq qorǵaý salasyndaǵy mindetterdiń iske asyrylý barysymen tanysty. Ol qylmystyq prosesti jańǵyrtý jónindegi qanatqaqty jobanyń búkil elge masshtabtalǵanyn atap ótti. Bul sondaı-aq qylmystyq is júrgizý zańnamasyna engizilgen tıisti túzetýler arqyly bekitilgen. Osy oraıda bul jumystyń jergilikti jerlerde qanshalyqty durys uıymdastyrylǵanyn túsiný mańyzdy.
Almatyda qylmystyq prosestiń úsh býyndy modelin engizý qalaı ótip jatqany týraly qala prokýrorynyń mindetin atqarýshy Nazarbaı Ibraımoldaev aıtyp berdi.
«2021 jyly Almaty polısııasy qylmystyq ister boıynsha 30 225 prosestik sheshim qabyldady, onyń 24 708-i prokýrormen kelisilip, bekitildi. Iаǵnı «prokýrorlyq súzgi» azamattardyń quqyqtaryn buzý 38%-ǵa azaıtýǵa múmkindik berdi», dedi N.Ibraımoldaev.
Keńes aıasynda Áset Isekeshevke qylmystyq isterdi júrgizýdiń jańa formaty, qyzmetkerlerdiń jumys oryndaryn jabdyqtaý jáne óńdeletin derekterdiń qaýipsizdigin qamtamasyz etý ádisteri kórsetildi.
«Qazir Polısııa departamentinde qylmystyq isterdi elektrondy formatta júrgizý úshin 375 jumys orny jabdyqtalǵan. E-formatty qoldaný polıseılerdiń jumysyn ashyq etedi, al derekterdi qorǵaý boıynsha paıdalanylatyn tehnologııalar qylmystyq iste qujattardyń burmalanýyna jáne aýystyrylýyna jol bermeıdi», dedi Almaty qalalyq Polısııa departamentiniń bastyǵy Qanat Taımerdenov.
Elektrondy format qabyldanatyn sheshimderdi kelisý prosesin jeńildetýge jáne jyldamdatýǵa, sybaılas jemqorlyq táýekelderin tómendetýge jáne tergeý sapasyn jaqsartýǵa múmkindik berdi.
Sondaı-aq Qaýipsizdik Keńesiniń hatshysy Almatynyń jol qaýipsizdigin baqylaý júıesiniń jumysymen tanysty. Júıe Almaty PD jedel basqarý ortalyǵyna shoǵyrlandyrylǵan 2 myńnan astam beınekameradan turady.
Máseleni talqylaý barysynda Áset Isekeshev polısııanyń servıstik modelin qanatqaqty rejimde engizý prosesi elimizdiń úsh óńirinde júzege asyrylyp jatqanyn aıtty. Onyń aıtýynsha, Almaty elimizdiń eń iri qalasy bolǵandyqtan, munda qanatqaqty jobany iske asyrýǵa jaýapkershilikpen qaraý mańyzdy.
«Quqyq buzýshylyqtyń aldyn alýdyń qazirgi zamanǵy júıesin qurý tásilderi men polısııanyń servıstik modelin el Prezıdenti janyndaǵy Quqyq qorǵaý jáne sot júıelerin reformalaý jónindegi komıssııa maquldady.
Sondyqtan sizder polısııanyń servıstik úlgisi jumysynyń negizgi qaǵıdattaryn, ondaǵy ákimdiktiń, basqa da memlekettik organdar men jurtshylyqtyń rólin túsinýlerińiz qajet.
Sizder qanatqaqty aýmaqtyń, keıin memleket pen qoǵamnyń áriptestigine negizdelgen qalanyń qaýipsizdik júıesiniń vızıt kartochkasy bolyp tabylatyn Almaty qalasynyń búkil aýmaǵynda jınaqtalǵan tájirıbeni taratý úshin bazalyq aýdan bolatynyn túsinýlerińiz qajet.
Bul rette qazirdiń ózinde eń krımınogendi aýdandardaǵy qylmystyń naqty kórinisin qalyptastyrý jáne búkil qala boıynsha sharalar keshenin anyqtaý úshin sarapshylarmen, quqyq qorǵaý organdarynyń ardagerlerimen, jobalyq keńse aıasynda sarapshylarmen jumysty kúsheıtý kerek. Qajet bolǵan jerlerde beınekameralar qoıý, ýchaskelik pýnktter sanyn arttyrý, patrýldeýdi kúsheıtý, jaryqtandyrýdy jaqsartý sharalaryn qoldanǵan jón», dep atap ótti Á.Isekeshev. Qaýipsizdik Keńesiniń hatshysy quqyqtyq tártip deńgeıin odan ári arttyrý boıynsha sapaly jumys júrgizý qajettigin atap ótip, birqatar naqty tapsyrma berdi.
Keńeske Bas prokýror Ǵızat Nurdáýletov, Ishki ister mınıstri Erlan Turǵymbaev, Prezıdent Ákimshiliginiń Qaýipsizdik jáne quqyq tártibi bóliminiń meńgerýshisi Alekseı Kalaıchıdı jáne Almaty qalasynyń quqyq qorǵaý organdarynyń basshylary qatysty.