Qazirgi kezde koronavırýs indetimen aýyrǵandar Jambyl óńirinde de kóptep tirkelýde. Qaýipti indetpen kúni búginge deıin 10 myńnan asa turǵyn aýyrǵan. О́kinishke qaraı, júzdegen adam qaıtys bolǵan. Qabyldanǵan jedel sharalardyń jáne bilikti dárigerlerdiń eńbeginiń nátıjesinde koronavırýsty jeńip shyqqandar da bar.
Qazirgi kezde qaýipti indetti juqtyrý deregi kún sanap artyp barady. Dárigerler aýrý juqtyrmaýdyń eń tıimdi joly qaýipsizdik sharalaryn qatań saqtaýmen qatar, vaksına alý ekenin de aıtýda. Koronavırýstan jazylǵandardyń qatary da kóbeıýde.
Máselen, Jambyl aýdanynyń 65 jastaǵy turǵyny shilde aıynyń ortasynda Jambyl oblystyq kópbeıindi aýrýhanasynyń juqpaly aýrýlar qurylymyna kelip túsken. Oblystyq densaýlyq saqtaý basqarmasynyń málimetinshe, naýqastyń aýrýhanaǵa túsken kezdegi jaǵdaıy tym aýyr bolǵan. Oǵan qosa naýqasta qant dıabeti, arterıaldy gıpertenzııa jáne tynys alý jetispeýshiliginiń 1-dárejesimen qatar, ıntoksıkasııalyq sındromynyń bolýyna baılanysty jansaqtaý bóliminde baqylaýda bolǵan. Turǵyn aýrýhanaǵa túsken kúnnen bastap, tynys alý jetispeýshiligi 2, 3-dárejege deıin tómendep, jasandy tynys alý apparatyna qosylǵan. Naýqastyń jaǵdaıyna baılanysty Densaýlyq saqtaý basqarmasynyń málimeti boıynsha, der kezinde júrgizilgen keshendi emniń nátıjesinde pasıenttiń jaǵdaıy jaqsarǵan.
«Jaz mezgilinde tórt kún qatarynan toıǵa baryp edim. Besinshi kúni dene qyzýym kóterilip, boıymdy álsizdik basyp aldy. Býyndarym aýyra bastady. El saldyryp jatqan vaksınany da alǵan joq edim. Úıden dáriler iship, ekpeler qabyldadym. О́zdiginen júrgizilgen emnen jaǵdaıym jaqsarmaǵan soń, jedel járdem shaqyrdym. Osylaısha aýrýym odan saıyn asqynyp, jansaqtaý bóliminen bir-aq shyqtym. Munda kelgende dárigerler maǵan eki jaqty pnevmonııa, ókpeniń 76 paıyz qabynýy degen dıagnoz qoıdy. Eki apta boıy ókpeni jasandy jeldetý apparatyna qosty. Dárigerlerdiń tabandylyǵynyń nátıjesinde qaýipti vırýstan aman qaldym», deıdi naýqas.
Sol sııaqty Taraz qalasynyń 52 jastaǵy turǵyny da jýyrda saýyǵyp shyqty. Ol da shilde aıynyń ortasynda ókpeniń 90 paıyz zaqymdanýymen aýyr halde aýrýhanaǵa túsken. Eki apta boıy jansaqtaý bóliminde jatyp, jasandy jeldetý apparatynda bes kún, ókpeni ınvazıvti emes jeldetý apparatynda úsh kún em qabyldaǵan. Qaýipti indetpen bir aı boıy alysqan azamattyń búginde jaǵdaıy jaqsy.
«Koronavırýs indetine shaldyqqan naýqastarmen tikeleı qarym-qatynasta bolǵan joqpyn. Degenmen ózim bazarda saýda-sattyqpen aınalysamyn. Ol jerde adam kóp. Sodan shilde aıynyń basynda aýyryp qaldym. Bul indetti men bazardan juqtyrdym. Sebebi qonaqqa barǵan joqpyz, jaqyndarymdy kórmegeli de birneshe aı boldy. Tek telefon arqyly habarlasyp turamyz. Aldymen álsirep, tońyp, dirildeı bastadym. Birneshe kúnnen keıin ıis pen dám sezbeı qalǵanymda, koronavırýs juqtyrǵanymdy túsindim. Úıde birneshe kún emdelgenimmen bolmaı, jótel údep, qan aralas qaqyryq túse bergen soń, jedel járdemmen aýrýhanaǵa keldim. Men bastapqyda óz-ózime kele almaı, tynys alý apparatynda jattym», degen azamat ózine ekinshi ómir syılaǵan aq halatty abzal jandarǵa alǵysyn bildirdi.
Árbir azamattyń amandyǵy – elimizdiń baılyǵy. Kúni-túni ómirin qaterge tigip júrgen dárigerlerdiń de tilegi – eldiń amandyǵy. Bul rette emdeýshi dáriger Parıda Qurmanbaeva pasıenttiń saýyǵýy bir ǵana dárigerdiń emes, naýqastyń óziniń emdelýge degen yntasyna da baılanysty ekenin aıtty.
«Koronovırýspen aýyrǵan adam bar kúshin osy dertti jeńýge jumsaýy tıis. Aǵza álsirep qalady, sondyqtan ózin-ózi kútip, qalypqa keltirý qajet. Ol úshin toı-tomalaqtan, jıyndardan, adam kóp shoǵyrlanatyn oryndardan bas tartý kerek. Dárýmenge baı tamaqtardy iship, uıqyǵa mán bergen durys. Sonymen qatar taza aýada serýendeý, sportpen shuǵyldaný, salamatty ómir saltyn qalyptastyrýǵa kóp kóńil bólý kerek», deıdi ol.
Aýrýhana qyzmetkerleri naýqasynan aıyqqan azamattardy úılerine shyǵaryp salýda. Olar úshin bir adamnyń ómirin arashalap qalý – úlken qýanysh. Degenmen kún sanap órship bara jatqan qaýipti indet adamdarǵa qaýip tóndirýde. Al aq halatty abzal jandar barsha azamatty qaýipsizdik talaptaryn barynsha saqtaýǵa shaqyrýda.