Nursultan Nazarbaev qorǵanys mınıstri Nurlan Ermekbaevpen telefon arqyly sóılesti, dep habarlaıdy Egemen.kz.
Elbasy saıtyndaǵy aqparat boıynsha, áńgime barysynda Qaýipsizdik Keńesiniń tóraǵasy óńir halqynyń qaýipsizdigin qamtamasyz etý jáne Jambyl oblysy, Baızaq aýdanyndaǵy tótenshe jaǵdaıdyń saldaryn joıý boıynsha qabyldanyp jatqan sharalar týraly habardar etildi.
Qazaqstannyń Tuńǵysh Prezıdenti osy oqıǵa saldarynan qaza bolǵandardyń týystary men jaqyndaryna kóńil aıtyp, zardap shekkenderdiń tezirek saýyǵyp ketýine tilektestik bildirdi.Eske salaıyq, 26 tamyzda keshke Jambyl oblysy, Baızaq aýdanyndaǵy áskerı qoımanyń mańynan órt shyǵyp, jarylys boldy. Keıingi aqparatqa sáıkes, 90-ǵa jýyq adam zardap shekken. Bes áskerı qyzmetshi qaıtys boldy.