Qaznet qoldanýshylary bıylǵy oqý jylynda mektep ashanalarynda balalarǵa mindetti túrde quramynda koronavırýsqa qarsy vaksına bar ıogýrt, aıran jáne qatyq beriletini týraly beınerolık taratýda, dep habarlaıdy Egemen.kz Stopfake.kz-ke silteme jasap.
2021 jyldyń sáýir-maýsym aılarynda buqaralyq aqparat quraldary Reseıde qyshqyl sút ónimderi túrinde vaksınalar shyǵaryla bastady degen habar taratqan. Sol kezde ǵalymdar atalmysh preparattardy ázirleý boıynsha jumysty endi bastaǵan. Alaıda, Covid-19-dan qorǵaıtyn ıogýrttar, aıran jáne ashytylǵan sút ónimderi resmı túrde klınıkalyq synaqtan ótpegen jáne naryqqa kirmegen.
Mundaı ashytylǵan sút ónimderi mektep ashanalarynda balalarǵa mindetti túrde beriledi degen qaýeset aqparatty Densaýlyq saqtaý mınıstrligi joqqa shyǵardy.
«Bul aqparat shyndyqqa janaspaıdy. Qazaqstanǵa azyq-túlik túrindegi eshqandaı vaksına ákelingen joq», dep habarlady vedomstvonyń baspasóz qyzmeti.
Osylaısha, mektep ashanalarynda KVI-ge qarsy ımmýndaý preparattary bar sýsyndar men ónimder usynylmaıdy, dep jazady basylym.
Eske sala ketsek, elimizde balalardy vaksınasııalaý tek ata-analardyń nemese qamqorshylardyń jazbasha kelisimimen ǵana múmkin bolady.