Elbasy Nursultan Nazarbaev Jambyl oblysyndaǵy áleýmettik-mádenı nysandardy aralady, dep habarlaıdy Egemen.kz Tuńǵysh Prezıdenttiń resmı saıtyna silteme jasap.
Qazaqstannyń Tuńǵysh Prezıdenti áleýmettik-mádenı nysandardy aralamas buryn Jambyl oblysynyń ákimi Berdibek Saparbaevpen kezdesti. Kezdesý barysynda Elbasyna áskerı qoımalardaǵy jarylystardan zardap shekken Baızaq aýdanynyń turǵyndaryna qalpyna keltirý jumystarynyń barysy men kómek kórsetý boıynsha qabyldanyp jatqan sharalar týraly málimet berildi.
Sondaı-aq, Jambyl oblysynyń ákimi Elbasyna óńirdiń áleýmettik-ekonomıkalyq damýy, Nur Otan partııasynyń saılaýaldy baǵdarlamasynyń iske asyrylý barysy men agrarlyq sektordaǵy jáne halyqty jumyspen qamtý máselelerin sheshýge baǵyttalǵan sharalar týraly aqparat usyndy. Qazaqstannyń Tuńǵysh Prezıdenti óńir basshylyǵynyń jumysyna oń baǵa berdi.
Kezdesýden keıin Nursultan Nazarbaev «Áljan ana» tarıhı mýzeıiniń qyzmetimen tanysyp, mekeme aýmaǵynda aǵash otyrǵyzý rásimine qatysty. Sonymen qatar, Qazaqstannyń Tuńǵysh Prezıdenti kitaphana men túrli úıirmeler jumys isteıtin aýyldyq mádenıet úıinde boldy.
Qazaqstannyń Tuńǵysh Prezıdenti sporttyq-saýyqtyrý kesheniniń jumysymen de tanysty. Keshenge úlken arena, ámbebap zal, boks jáne kúres zaly kiredi. Qazirgi ýaqytta sporttyq-saýyqtyrý kesheninde sporttyń alty túri: erkin kúres, taekvondo, karate, voleıbol, fýtbol, boks boıynsha 400-den astam balalar men jasóspirimder jattyǵýda.