«Qazaqstan temir joly» UK» AQ Mańǵystaý oblysy ákimdiginiń suranysy boıynsha osy jyldyń birinshi qarashasyna deıin jem-shóp tasymaldaýǵa jeńildik tarıfterin engizý týraly sheshim qabyldady. Bul týraly Mańǵystaý oblysy ákiminiń baspasóz qyzmeti habarlady, dep jazady Egemen.kz.
2021 jyldyń 20 qyrkúıeginen bastap 2021 jyldyń 31 qazan aralyǵynda «QTJ-Júk tasymaly» JShS – «Mańǵystaý JK bólimshesi» fılıalynyń stansııasynda respýblıkalyq qatynasta ámbebap menshikti vagondarmen bıdaı kebegin, qurama jemdi, arpany, astyq qaldyqtaryn, kúnjarany, jemshóp untaǵyn, tamaq ónerkásibiniń qaldyqtaryn tasymaldaý mynadaı tártippen esepteledi:
1) magıstraldyq temir jol jelisi qyzmetteriniń tarıfteri QR Tabıǵı monopolııalardy retteý Komıteti belgilegen esepteý tártibine sáıkes tolyq kólemde esepteledi;
2) lokomotıvtik tartym qyzmeti men júk jáne kommersııalyq jumys qyzmetteriniń tarıfteri 0,01 koeffısıentimen esepteledi;
3) «Qaztemirtrans» AQ vagondary úshin jumys mólsherlemesi 0,01 koeffısıentin qoldana otyryp esepteledi;
4) Basshylyqta belgilengen júkterdi tasymaldaýǵa baılanysty qosymsha qyzmetter úshin 0,01 koeffısıentin qoldana otyryp esepteledi;
5) Magıstraldy, stansııalyq joldarda menshikti vagondardyń aıaldaǵany úshin tólem 0,01 koeffısıentin qoldana otyryp esepteledi.
0,01 koeffısıenti degenimiz-tómendetilgen jeńildik tarıfi. Tasymaldaý tiziminiń somasy belgilengen esepteý tártibine sáıkes júrgiziledi. Iаǵnı 0,01 koeffısıenti tasymaldaýshynyń tiziminde kórsetilgen júktiń sanyna kóbeıtiledi. Nátıjesinde jetkizilgen taýardyń eń tómengi esebi shyǵady.
Mysaly, qurama jem tıelgen vagon Qostanaı-Mańǵystaý baǵyty boıynsha jiberiletin bolsa, standartty tarıfter boıynsha tasymaldaý quny shamamen 420 myń teńgeni quraıdy. 0,01 tómendetilgen jeńildikti tarıfpen esepteýler boıynsha osy marshrýt boıynsha jetkizý somasy shamamen 100 myń teńge.