Qazaqstan Respýblıkasynyń Bilim jáne ǵylym mınıstri Ashat Aımaǵambetov Perm ýnıversıtetindegi atys saldarynan qaza tapqandardyń týystary men jaqyndaryna kóńil aıtty, dep habarlaıdy Egemen.kz.
«Zardap shekkenderdiń tez saýyǵyp ketýin tileımin. Qazan mektebinde bolǵan terakt kezinde qaza tapqandardyń jaqyndarynyń jaralary da áli jazyla qoımady. Bul qaıǵyly oqıǵalar elimizdegi mektepterde, kolledjderde jáne joǵary oqý oryndarynda balalardyń qaýipsizdigin jaqsartý qanshalyqty mańyzdy jáne asa qajet ekenin kórsetedi. Olardyń qaýipsizdik máselesi bilim berý mekemesiniń árbir basshysynyń basty mindeti bolýy tıis. Memleket basshysy Qasym-Jomart Toqaev bilim berý uıymdarynyń qaýipsizdigin qamtamasyz etý boıynsha tapsyrmalar berip qoıǵan. Sondaı-aq, bul másele Úkimet otyrysynda da jan-jaqty qaralyp, ákimdikter men memlekettik organdarǵa tıisti tapsyrmalar berildi», dedi Ashat Aımaǵambetov.
Onyń aıtýynsha, joǵary oqý oryndarynyń basshylyǵyna oqý ǵımarattarynda da, jataqhanalarda da qaýipsizdikti kúsheıtý boıynsha mynadaı jeke nusqaýlyq berildi: jabdyqtarǵa túgendeý júrgizý, ortalyqtan basqarylatyn beınekameralarmen qamtamasyz etý, kirip-shyǵýdyń baqylaý rejımin kúsheıtý. ýnıversıtetterde jáne tótenshe jaǵdaılarda qalaı áreket etý kerektigin úıretetin sabaqtar ótkizý.
Ol mınıstrlik basqa memlekettik organdarmen birge bilim berý obektilerin terrorızmge qarsy qorǵaýdy uıymdastyrý týraly qujat ázirlegenin atap ótti. Bul qujat jobasyn qoǵamdyq talqylaý kezinde Bilim jáne ǵylym mınıstrligine 2 myńnan astam suraqtar men túsiniktemeler kelip túsken.
«Qujat keıbir azamattardyń alańdaýshylyǵyn týǵyzdy, olar dabyl túımelerin, beınebaqylaý júıesin, týrnıketterdi ornatýǵa jáne tótenshe jaǵdaılar kezindegi áreketter boıynsha jattyǵýlar ótkizýge qarsy ekenin jazdy. Biraq men bul sharalardyń barlyǵy oqýshylardyń qaýipsizdigin qamtamasyz etýge, mundaı jaǵdaılardyń aldyn alýǵa baǵyttalatynyn aıtyp jaýap beremin. Ár oqý ornynda barlyq qaýipsizdik sharalary qoldanylýy kerek. Ákimdikter bul máseleni keshendi túrde sheshý úshin qosymsha qarajat bóledi», dep jazdy mınıstr.
Bul - beınebaqylaý kameralary, kúzettiń dabyldaǵyshtary, dabyl túımeleri, kameralardy ishki ister bólimderiniń jedel basqarý ortalyqtaryna baılanystyrý, kirip-shyǵýdy baqylaý rejımi jáne qaýipsizdik júıesiniń basqa elementterine qatysty.
«Tehnıkalyq sharalardan basqa, qyzmetkerler men dáris alýshylardyń tótenshe jaǵdaılarda áreket etýge qatysty bilimi men daıyndyǵy da mańyzdy. Bilim berý uıymdarynda tárbıe jumysyn kúsheıtý máselesi óte ózekti. Biz bul aspektke erekshe mán beremiz», dedi ol.