Qyrkúıek aıynyń sońynda Mańǵystaýda jaýyn-shashyn jaýdyratyn tehnıkany iske qosý josparlanýda, dep habarlaıdy Egemen.kz. Bul týraly «Ferǵana» aqparattyq portalyna osy jobany júzege asyratyn Central Asian Center of Climate Change Technologies (CACCCT) JShS bas dırektory Altaı Aınabek aıtyp berdi.
12 qyrkúıekte CACCCT «Grant Qazaqstan» korporatıvtik qory men oblys ákimdigimen (ákimshiligimen) úshjaqty kelisimge qol qoıyldy. A.Aınabektiń aıtýynsha, Mańǵystaý oblysynda, bes keshennen turatyn Clear Sky Manager-diń bes jabdyǵy ornatylady.
«Tıimdi áreket etý aımaǵy - 100 myń sharshy shaqyrym. Jabdyqtar eldi mekenderde turady, óıtkeni bizge ınternet, elektr qýaty jáne jaqsy ınfraqurylym qajet. Biz osy máseleni retteý úshin áli de mamandarmen jumys isteımiz. Endi sońǵy 10 jyldaǵy meteorologııalyq derekterdi, jeldiń kóterilýi, jaýyn-shashyn deńgeıi týraly málimetterdi kútýdemiz. Sodan keıin ǵana ony qaı jerge ornatý kerektigin sheshemiz», dedi A.Aınabek.
Onyń aıtýynsha, pılottyq jobanyń quny - 5 mıllıon eýro.
«Mundaı tehnologııalar Orta Azııa aýmaǵynda, onyń ishinde Qazaqstanda alǵash ret qoldanylatynyn eskerip, biz 3,8 mıllıon eýrony ınvestısııalap otyrmyz. Taǵy 1 mıllıon 200 myńyn jeke ınvestorlar - fermerler, munaıshylar jáne jobanyń júzege asyrylýyn qalaıtyn azamattar óz qaltasynan shyǵarmaq», dedi ol.
Tájirıbe 13 aıǵa sozylady. Mańǵystaýda jasandy jaýyn-shashyn týdyrýǵa bıýdjetten áli qarajat qarastyrylmaǵan. Qazaqstannyń bıýdjettik klassıfıkasııasynda bul úshin qajetti kodtar joq, sonymen qatar CACCCT aldymen nátıjeni kórsetýge daıyn.