QR IIM shetelde QR azamatynyń tólqujatyn alýǵa úmitker Qazaqstan Respýblıkasynyń azamattarynan, sheteldikterden jáne azamattyǵy joq adamdardan QR vızalaryn alý kezinde daktıloskopııalyq aqparatty jınaý jáne óńdeý qaǵıdalarynyń qoldanylýy toqtatyla turatyn buıryq jobasyn daıyndady, dep habarlaıdy Egemen.kz.
«Shetelde Qazaqstan Respýblıkasy azamatynyń tólqujatyn alýǵa úmitker Qazaqstan Respýblıkasynyń azamattarynan, sheteldikterden jáne azamattyǵy joq adamdardan Qazaqstan Respýblıkasynyń vızalaryn alý kezinde daktıloskopııalyq aqparatty jınaý jáne óńdeý qaǵıdalaryn bekitý týraly» Qazaqstan Respýblıkasy Syrtqy ister mınıstriniń 2018 jylǵy 28 aqpandaǵy buıryǵynyń qoldanysy 2023 jylǵy 1 qańtarǵa deıin toqtatyla tursyn», delingen qujatta.
29 maýsymda Memleket Basshysy Qasym-Jomart Toqaev «Qazaqstan Respýblıkasynyń keıbir zańnamalyq aktilerine memlekettik feldegerlik baılanys jáne ishki ister organdarynyń qyzmeti máseleleri boıynsha ózgerister men tolyqtyrýlar engizý týraly» Zańǵa qol qoıdy, ol, atap aıtqanda, daktıloskopııalyq tirkeý merzimderin aýystyrýdy kózdeıdi.
«Tıisti qarjylandyrýdyń bolmaýyna baılanysty daktıloskopııalyq tirkeýdi qoldanysqa engizý merzimi 2023 jylǵy 1 qańtarǵa deıin toqtatyla tursyn», deıdi túzetýlerdiń biri.
Eske sala ketsek, 2016 jylǵy 30 jeltoqsanda «Daktıloskopııalyq jáne genomdyq tirkeý týraly» Zań qabyldandy, ol 2021 jylǵy 1 qańtardan bastap kúshine enýi tıis bolatyn. Alaıda, IIM múddeli memlekettik organdarmen birlesip, 2023 jylǵy 1 qańtardan bastap daktıloskopııalyq tirkeý bóliginde zańdardyń jekelegen normalaryn engizý merzimderin aýystyrý týraly usynystar engizdi.