Kókshetaý mektepteriniń birinde muǵalim birinshi synyp oqýshylaryn úıdegi dápterlerdi umytpaýǵa úıretýdi jón kórip, 12 oqýshynyń mańdaıyna «dápter» dep jazǵan, dep habarlaıdy Egemen.kz.
Sputnik Qazaqstan málimetinshe, oqıǵa 18 Qazanda № 13 mektep-gımnazııada bolǵan.
Mektep dırektory Svetlana Ahmetjanova atap ótkendeı, bul muǵalimniń 27 jyldyq kásibı ótili bar.
Oqıǵadan keıin muǵalimmen áńgime júrgizildi, keıin jumystan da bosatyldy.
«19 qazanda eńbek sharty birjaqty tártippen buzyldy», dep túsindirdi mektep-gımnazııa ákimshiligi.
Sondaı-aq, oqý ornyna qyzmettik tekserý júrgizildi.
«Qazirgi ýaqytta synypta oqý prosesi jalǵasýda. Balalarmen psıholog jumys istedi, al ata-analarmen jınalys ótkizildi», dep qorytyndylady oblys bilim basqarmasy.
Aıta ketsek, keıbir ata-analar muǵalimge qosylyp, muǵalimdi jumystan shyǵarmaýdy ótindi. Olardyń pikirinshe, ata-analar balalardyń tárbıesine nazar aýdaryp, mektepke daıyndyqty baqylaýy kerek.