Memleket basshysy Qasym-Jomart Toqaev Qazaqstan qarjygerleriniń IX Kongresine qatysýshylardy quttyqtap, beıneúndeý joldady, dep habarlaıdy Egemen.kz Aqordanyń resmı saıtyna silteme jasap.
Memleket basshysy óz beıneúndeýinde jıynǵa qatysýshylardy Qazaqstan qarjygerleri kongresiniń ashylýymen quttyqtady.
«Bıylǵy basqosý Ulttyq valıýta kúni jáne Táýelsizdigimizdiń 30 jyldyǵy qarsańynda ótip jatyr. Munyń sımvoldyq máni zor. О́ıtkeni tól teńgemiz – Eldigimiz ben Egemendigimizdiń shynaıy belgisi. Biz toqsanynshy jyldardyń basynda negizgi naryqtyq reformalardy júzege asyrdyq. Qarjy qatynastaryn keshendi túrde qaıta qarap, jańǵyrttyq. Álemdegi ozyq tájirıbeni eskere otyryp, bank salasyna túbegeıli ózgerister engizdik. Elimizdiń tolyqqandy qarjylyq ınfraqurylymy jasaldy. Sonyń nátıjesinde qor jınap, ony tıimdi jumsaýǵa múmkindik týdy. Sondaı-aq aýqymdy ınvestısııaǵa jol ashyldy», dedi Memleket basshysy.
Prezıdenttiń aıtýynsha, syndarly memlekettik saıasattyń arqasynda Qazaqstan básekege qabiletti qarjy sektoryn qalyptastyra aldy.
«Qazaqstannyń qarjy salasy óńirdegi eń ozyq júıe sanalady. Búginde onyń jıyntyq aktıvi 35 trıllıon teńgeden asady. Bul – elimizdiń ishki jalpy óniminiń teń jartysynan kóp», dep qosty Qasym-Jomart Toqaev.
Memleket basshysy koronavırýs pandemııasy jáne onyń saldary álem ekonomıkasyna orasan zor zııan keltiretinin eshkim kútpegenin, al naryqtardyń quldyraýy keıingi júz jylda bolǵan eń aıtýly oqıǵanyń biri ekenin aıtty.
«Memlekettik jáne halyqaralyq ınstıtýttardyń qabyldaǵan teńdessiz sharalary jaǵdaıdyń odan ári shıelenisip ketýine jol bermedi. Alaıda, shıkizat, saýda jáne qarjy salalaryndaǵy ahýal áli de qubylmaly bolyp tur. Jahandyq syn-qaterler men úrdisterdi eskere otyryp, qarjy salasyn odan ári damytý – memlekettiń basym baǵyttarynyń biri. Bul rette eldiń ekonomıkalyq ósimin qoldaý onyń negizgi mindeti bolyp qala beredi. Memleket qıyn kezeńderde otandyq qarjy sektoryn únemi qoldady. Sonyń arqasynda búginde bankterdiń jumysy turaqty ári ekonomıkany nesıelendiretin áleýeti joǵary. Sondyqtan olar ekonomıkany jyldam qalpyna keltirýde jáne ony odan ári ártaraptandyrýda negizgi ról atqarýǵa mindetti», dedi Qasym-Jomart Toqaev.
Ol otandyq qor naryǵyn, sonyń ishinde ekonomıkany qarjylandyrýdyń taǵy bir mańyzdy kózine aınalýy qajet «Astana» halyqaralyq qarjy ortalyǵyn belsendi damytý kerek ekenine nazar aýdardy.
«Bul máseleler baıypty talqylaýdy jáne teńgerimdi sheshimderdi izdestirýdi qajet etedi. Osy baǵyttardyń dáıekti damýy elimizdiń básekege qabilettiligin arttyrýǵa qosymsha jol ashady. Túptep kelgende, halqymyzdyń ál-aýqatyn arttyrý – memlekettik organdardyń, qarjy ınstıtýttarynyń aldyndaǵy ortaq mindet», dedi Prezıdent.
Beıneúndeý sońynda Memleket basshysy qarjy júıesiniń qyzmetkerlerin kásibı merekesimen taǵy da quttyqtap, kongress jumysyna tabys tiledi.