Oblys ortalyǵyndaǵy «Kókshetaý» mádenıet saraıynda oblystyq ákimdiktiń uıymdastyrýymen áıgili ánshi Qajybaı Jahınniń qurmetine «Arqanyń Aıbozy» atty birinshi respýblıkalyq dástúrli án baıqaýy ótkizildi.
О́leń qonyp, án ushqan ólkedegi aq túıeniń qarny jarylǵan kún boldy bul! О́tken jyly mezgilsiz ómirden ótken keshegi Aqan seri, Birjan sal, Úkili Ybyraılardyń jolyn qýǵan, ilkiden jalǵasyp kele jatqan saf ónerdiń tynysyn ashyp, shyń basyna shyǵarýǵa umtylǵan Qajybaı Badyqulynyń esimin el esinde taǵy bir jańǵyrtý arqyly Arqanyń ánshilik dástúri sátimen sabaqtaldy. Jaman tumaý jaılaǵaly boıkúıez bolyp qalǵan ánshiler qaýymy bir jelpinip, kúni keshe «qulaqtan kirip boıdy alar» ánimen terbetken týma talant Qajybaıyn esine alyp, mezgilsiz ómirden ótkenine kúızeldi. Týǵan eliniń taǵzymyna razy bolyp, eńsesin tiktedi.
Birinshi respýblıkalyq dástúrli ánshiler baıqaýynda Qaraǵandy, Soltústik Qazaqstan, Shyǵys Qazaqstan, Pavlodar, Aqmola oblystarymen qatar, Nur-Sultan, Almaty, Shymkent qalalarynyń ókilderi óner kórsetip, uzyn-yrǵasy jıyrmadan astam ánshi baq synady.
Dástúrli ánniń mereıin asyryp júrgen án sańlaqtary ónerimen shýaq shashqan gala konserttiń shymyldyǵy aqyn Qýanysh Ospanovtyń «Arqanyń Aıbozy» atty poemasynyń jelisinde qoıylǵan prologpen bastaldy. Talaı án dodasynda ónerimen el qurmetine bólenip júrgen jeztańdaı ánshiler birinen soń biri shyǵyp, Kókshetaý aspanyn asqaq ánderimen terbetti. Respýblıkalyq ánshiler baıqaýynyń laýreaty Baýyrjan Nurmahan Birjan saldyń «Aıtpaı» ánin oryndap, ózindik mánerimen, asqaq daýysymen tyńdarman qaýymdy tánti etti. Nur-Sultan qalasynyń qos dástúrli ánshisi Alýa Qalymbekova men О́zgeris Sherikbaıdyń oryndaý sheberligi de kóp kóńilinen shyqty. Qajybaıdyń kýrstasy, Qazaqstan Respýblıkasynyń eńbek sińirgen ártisi Ramazan Stamǵazıev, Alashtyń belgili dástúrli ánshisi Erkin Shúkiman bastaǵan qazylar alqasynyń uıǵarymy boıynsha Soltústik Qazaqstan oblysynyń ánshisi Erkebulan Qarypov úshinshi orynǵa ıe bolsa, ekinshi oryn Nur-Sultan qalasynan kelgen О́zgeris Sherikbaıǵa buıyrdy. Birinshi orynǵa astanalyq Alýa Qalymbekova kóterildi. Al, bas júlde kókshetaýlyq dástúrli ánshi Baýyrjan Nurmahanǵa buıyrdy. Júzden júırik atanǵan Baýyrjanǵa arnaıy dıplom men avtokólik tabys etilse, kóp kóńilinen shyqqan ánshilerdiń bári qomaqty syılyqqa ıe boldy.
Shara barysynda ánshi týraly taıaýda ǵana jaryq kórgen «Kóksheniń Aıbozy» estelikter jınaǵynyń tusaýkeseri ótkizildi. Jınaqta ánshiniń úzeńgi joldastarynyń, el aǵalarynyń, ónerine tánti bolǵan tyńdarman qaýymnyń jyly estelikteri toptastyrylǵan.
Eki kún boıy Kóksheniń kógildir aspany án lebimen jelpinip, ári-beri kóshkendeı boldy. Tyńdarman qaýym tabıǵı talant ıesine kórsetilgen zor qurmetke shyn kóńilden razy boldy.