Búgingi kúni elimizdegi búkil ǵylymı ınstıtýttar men joǵary oqý oryndarynyń birlesken jumysyn júrgizý mindeti tur. Bul týraly Bilim jáne ǵylym mınıstri Ashat Aımaǵambetov ǵylymı-zertteý ınstıtýty forýmynda málim etti, dep habarlaıdy Egemen.kz.
«Memleket basshysy ǵylym men bilimdi damytý úshin barlyq jaǵdaıdy jasady. Instıtýt, ýnıversıtetter mekteptermen, oqýshylar saraılarymen tyǵyz jumys isteýi kerek. Bizde osy sala aqsap tur. Ol tek kásibı baǵyttaǵy jumys emes, ártúrli ǵylym jarystar, olımpıadalar uıymdastyrý. Almaty qalasyndaǵy qaı mektepti alsaq ta, ǵylymı ınstıtýttar, ýnıversıtet mamandarymen birlese jumys isteýge qýana kelisedi. Instıtýttarǵa mekteptermen birlese jumys isteýdi tapsyramyn. Biz Prezıdent tapsyrmalaryn sapaly, ári, tyńǵylyqty uıymdastyrý kerekpiz. Bizdiń ǵylymı áleýetimiz joǵary. Standarttarǵa saı kelmeıtin JOO-lardy jaýyp jatyrmyz», dedi mınıstr.
Budan bólek birlese maman daıyndaý úshin ǵylymı-zertteý ınstıtýttarynyń zerthanalary magıstranttar men doktoranttarǵa, al oqý oryndarynyń zerthanalary ınstıtýt qyzmetkerlerine qoljetimdi bolady. Olar Ulttyq ıadrolyq ortalyq, Iаdrolyq fızıka ınstıtýty, Ulttyq bıotehnologııa ortalyǵy, Bıologııalyq qaýipsizdik ınstıtýty jáne taǵy da basqa teńdessiz ǵylymı zerthanalarda jumys istep, taǵylymdamadan óte alady.
Sondaı-aq joǵary oqý oryndary men ǵylymı-zertteý ınstıtýttarynyń qyzmetkerlerinen jasaqtalǵan júzden asa dıssertasııalyq keńes ashylady. Osyǵan deıin ǵylymı-zertteý ınstıtýttarynyń ǵalymdary dıssertasııalyq keńesterdiń jumysyna qajetti deńgeıde jumyldyrylmaǵan bolatyn.
Mınıstrdiń sózinshe, qabyldanǵan sharalar ǵylymı zertteý sapasy men ǵylymı kadrlardy daıyndaýdyń tıimdiligin arttyryp, ǵylymǵa talantty jastardy tartýǵa oń yqpal etedi.