Astana memlekettik qyzmet haby men onyń basqarýshy komıtet tóraǵasy Alıhan Baımenov memlekettik basqarý tájirıbesi men ǵylymyna qosqan zor úlesi úshin Amerıka memlekettik basqarý assosıasııasy (ASPA) «Memlekettik basqarýdyń halyqaralyq júldesimen» marapattaldy, dep habarlaıdy Egemen.kz.
ASPA atqarýshy dırektory Ýıllıam Shılds quttyqtaý hatynda: «Bul marapat Hab pen onyń tóraǵasyna halyqaralyq deńgeıde memlekettik qyzmettiń tıimdi júıelerin qurý men ony nyǵaıtýǵa, sondaı-aq memlekettik basqarý salasyndaǵy halyqaralyq yntymaqtastyqty damytýǵa qosqan eleýli úlesi úshin berildi», dep jazǵan.
ASPA - memlekettik basqarý salasynda álemdegi 10 myńnan astam kásipqoı mamandardy biriktiretin, kóp jyldyq tarıhy bar, halyqaralyq deńgeıde tanylǵan kásibı qaýymdastyq. 1939-shy jyldan beri bul uıym ǵalymdar men praktıkter arasyndaǵy mańyzdy kópir qyzmetin atqara otyryp, memlekettik jáne kommersııalyq emes basqarýdyń ǵylymy, bilimi jáne praktıkasynyń damýyna yqpal etip keledi.
Quttyqtaý hatta marapattaý rásimi 2022 jylǵy naýryz aıynda ASPA-nyń jyl saıynǵy konferensııasy aýqymynda ótkiziletini aıtylǵan.
Búginde Hab 42 qatysýshy memleket pen 70-ten astam ınstıtýsıonaldy seriktestermen tyǵyz qarym-qatynasta jumys jasaıdy.