Nur-Sultan qalasynyń ákimi Altaı Kólginov Instagram paraqshasynda qurylysy júrip jatqan kópirler jaıly málim etti, dep habarlaıdy Egemen.kz.
«Qala halqy sanynyń jyl saıynǵy ósýine baılanysty jol ınfraqurylymyna túsetin kúsh te artyp keledi. Jol jelisine túsetin júktemeni azaıtý úshin qala ishinde, eldi mekenderde jańa jol salamyz, sol sııaqty eskirgen tustaryn jóndeımiz. Kópirler men kólik qıylystaryna erekshe kóńil bólinedi.
Qazir elordada eki kópirdiń qurylysy júrip jatyr. Qalany aralaý barysynda Esil ózeni arqyly ótetin Táýelsizdik dańǵyly boıyndaǵy kópir qurylysymen tanystym. Kópirge qatysty sot prosesteri bolǵandyqtan qurylysy uzaqqa sozylǵan nysanǵa aınalyp kete jazdady. Biraq problemalary sheshilip, kúzde kópir qurylysy qaıta bastaldy», dep jazdy elorda ákimi.
Onyń aıtýynsha bul kópir Táýelsizdik dańǵyly, jańa temirjol vokzaly aýdany, Áziret Sultan meshiti aýdany, Nájimedenov kóshesi, Qoshqarbaev dańǵyly, Baıtursynov kóshesi, Qordaı kóshesi, Aınakól kóshesi, Momyshuly dańǵylynyń sol jaǵalaýmen jáne t.b. qosymsha baılanysty qamtamasyz etýge múmkindik bermek. Atalǵan kópirdiń qurylysyn kelesi jyly aıaqtaý josparlanyp otyr.
«Uly dala dańǵylynda da kópir qurylysy júrip jatyr. Oń jáne sol jaǵalaýdy jalǵaıtyn kópir Máńgilik El dańǵyly, Nájimedenov, Baıtursynov, Qoshqarbaev kóshelerine, Nova city aýdanyna, «Myńjyldyq» alleıasyna túsetin kúshti azaıtady. Temirjol vokzalynyń, Telman, Promyshlennyı eldi mekenderiniń, Metro gıpermarketi aýdanynyń, Jumabaev dańǵyly, Júrgenov kóshesiniń jáne t.b. qoljetimdiligi artady.
Sońǵy eki jylda 300 kóshe salyndy jáne jóndeldi, olardyń jartysynan kóbi – eldi mekenderde, sol sııaqty jańa avtobýs baǵyttary iske qosyldy. Sonymen qatar, avtobýs parkin jańartamyz. Bıyl jelige taǵy da 100-den astam elektr avtobýsyn iske qosýdy josparlap otyrmyz», dep jazdy elorda ákimi.