Memleket basshysynyń «Qazaqstan» ulttyq telearnasyna qazaq tilinde bergen suhbatyn qyzyǵa tyńdap, belgili telejýrnalıst Jaına Slambekqyzynyń kópshiliktiń kókeıinde júrgen kúrdeli saýaldardy Prezıdentke ótkir qoıǵanyna jáne olardyń bárine Qasym-Jomart Toqaevtyń búkpesiz de baısaldy jaýap bergenine rıza boldyq.
Memleket basshysy negizgi taqyryp – «Qasiretti qańtar» jaıynda aıta kelip, beıbit mıtıngterdi elimizde ádildik ornatý maqsatynda qolǵa alynǵan reformalarǵa qarsy kúshter óz múddelerine paıdalanýǵa tyrysyp, ózderi ádeıi daıyndaǵan qarýly qaraqshylardy qandy qylmysqa jumsaǵandyǵyn aıtty. «Tergeý jumystary óte aýqymdy. Onyń nátıjesi týraly aıtýǵa áli erte. Biraq kóp uzamaı, halyqtyń barlyq suraqtaryna jaýap beriledi. Árbir is muqııat qaralyp, aqıqatqa jetýimiz kerek. Mundaı qaıǵyly oqıǵa endi qaıtalanbaýy úshin qaraqshylar jazasyz qalmaýy qajet. Tergeý barysyndaǵy azaptaý máselesine kelsek, «shash al dese, bas alatyn» áreketterge jol berýge bolmaıdy. Qazir belgili zańgerlerden qurylǵan komıssııa jumys isteýde», degen Prezıdent pikirimen kelispeý qıyn.
Áleýmettik jelilerde syn saǵatta elimizge Ujymdyq qaýipsizdik týraly shart uıymynyń bitimgershilik kontıngenti engizilgenine baılanysty shyndyqqa janaspaıtyn pikirler jarııalanyp jatqanynan habardar ekenin aıtqan Qasym-Jomart Toqaev «Qazaqstan Reseıge boryshtar bolyp qaldy, elimiz táýelsizdiginen aıyryldy» degen sózderdiń negizsizdigin jáne UQShU bitimgerleriniń birde-bir oq atpaǵanyn ashyq málimdegeni de jón boldy.
Memleket basshysynyń olıgopolııa týraly suraqqa da týra jaýap berip, sany shekteýli adamdardyń el ekonomıkasynda ústemdik qurǵandyǵymen kelisýge bolmaıtyndyǵyn, qoǵamda ádilettilik ornatýǵa kedergi bolyp otyrǵan bul máseleni birjola sheshý qajettigin aıtqandyǵy da Prezıdentimizdiń ózi ustanǵan baǵytynan taımaı, batyl is-qımylǵa kóshkenin ańǵartty.
Elden zańsyz shyǵarylǵan qarjyny qaıtarý máselesi de kópshilik kókeıinde júrgen ózekti jaıt ekeni málim. Osy jóninde Memleket basshysy Úkimetke eki aı ishinde naqty usynystar ázirleýdi tapsyrǵan bolatyn. «Bul – óte kúrdeli jáne uzaq ýaqyt alatyn jumys. Biraq ádildikke jetý úshin biz osyny isteýimiz qajet», dedi Prezıdent jýrnalıstiń suraǵyna oraı.
Bul suhbat Prezıdentimizdiń árdaıym óz halqymen birge ekenin, elimizdiń táýelsizdigin saqtaý, ádiletti qoǵam ornatý maqsatyn basty muraty sanaıtyndyǵyn, ana tilin ardaq tutatynyn taǵy bir aıǵaqtap berdi.