Bıleýshi partııanyń atqarýshy hatshysy Ashat Oralov partııanyń jańa ataýyn túsindirdi, dep habarlaıdy Egemen.kz.
«Búgin onlaın rejımde bizdiń partııanyń kezekten tys 22-shi sezi ótti, oǵan elimizdiń barlyq óńirlerinen 393 delegat qatysty.
Búgin biz partııa tóraǵasynyń tapsyrmasy boıynsha daıyndalǵan partııany jańǵyrtý baǵdarlamasyn talqyladyq. Sezd delegattary men tanystyrǵan baǵdarlamany biraýyzdan qoldady. Jańǵyrtý aıasynda Parlament Májilisindegi «Nur Otan» fraksııasynyń jetekshisi Erlan Jaqanuly Qoshanov partııaǵa «AMANAT» jańa ataýyn usyndy. Prezıdent, partııa Tóraǵasy Qasym-Jomart Kemeluly óz sózinde bul bastamany qoldady. Sezd delegattary da tolyq qoldaý bildirdi. Osyny eskere otyryp, Sezd partııa Jarǵysyn ózgertý týraly sheshim qabyldady, jańǵyrtý baǵdarlamasyn, partııanyń jańa ataýy men logotıpin bekitti», dep jazdy Ashat Oralov Facebook-te.
Ashat Oralov partııaǵa nelikten «AMANAT» ataýy berilgenin túsindirdi.
«Birinshiden, «AMANAT» - memlekettiń múddesin qorǵaıtyn jáne eldiń damýy úshin tarıhı jaýapkershilikti óz moınyna alǵan partııa. Táýelsiz Qazaqstannyń orasan zor aýmaǵy men berik memlekettilikti bizge ata-babalarymyz mura etip qaldyrǵan. Bul ejelden qazaqtar arasynda amanat dep atalǵan qasıetti qundylyq. Ony saqtaý jáne bolashaq urpaqqa jetkizý – bul elimizdiń basqarýshy partııasyna júktelgen zor jaýapkershilik.
Ekinshiden, «AMANAT» partııasy – halyqtyń tarıhı-mádenı murasyn saqtaýshy. Bizdiń ulttyq mádenıetimiz, tilimiz jáne ǵasyrlar boıy qalyptasqan salt-dástúrlerimiz de bizge amanat retinde jetken. Sondyqtan, biz bul murany saqtaımyz jáne damytamyz. Ulttyq qundylyqtarymyzdy el ıgiligi úshin kózdiń qarashyǵyndaı qorǵaý, ulttyq jáne mádenı baılyǵymyzdy baǵa jetpes syı retinde, birligimizdiń negizi retinde saqtaý – partııanyń basty mindetteriniń biri.
Úshinshiden, «AMANAT» - memleket múddesine adal jáne qoǵam ıgiligi úshin qyzmet etetin partııa. Halyq «Amanatqa qııanat jasalmaıdy» deıdi. Bul eń aldymen adal bolý degendi bildiredi. Bizdiń partııalyqtar – óz eliniń adal patrıottary, birinshi kezekte halyq pen memlekettiń múddesine adal jandar.
Tórtinshiden, «AMANAT» - halyqtyń daýysyn estıtin partııa. Saılaý kezinde saılaýshylardyń qalaýy men tilekteri - halyqtyń daýysy. Olar saılaýaldy baǵdarlamanyń negizin qalaıdy. Saılaýshylardyń ótinishterin nemese amanattaryn oryndaı otyryp, partııa halyqtyń erkin oryndaıdy. Qoǵamdyq qabyldaýlar men qoǵamdyq keńester arqyly partııa halyqtyń máselesin tyńdaıdy, olardy bılikke jetkizedi jáne olardy sheshý jolynda praktıkalyq qadamdarǵa qol jetkizedi.
Besinshiden, «AMANAT» - qoǵamdaǵy áleýmettik ádilettilikti jáne barlyq azamattar úshin teń múmkindikter jasaýdy jaqtaıtyn partııa. Biz ózara kómek ıdeıasyn, álsizderge qoldaý kórsetýdi ilgeriletemiz, qoǵamnyń osal toptarynyń múddelerin qorǵaımyz. Osylaısha, partııa tatý kórshilik, senim men meıirimdilik ornaǵan, sondaı-aq halyqtyń ál-aýqaty ósip kele jatqan ádil qoǵamnyń qalyptasýyna yqpal etedi.
Altynshydan, «AMANAT» - otbasy jáne qoǵamnyń birligi sııaqty dástúrli qundylyqtardy nasıhattaıtyn partııa. Jas urpaqty tárbıeleý – eldiń táýelsizdigi men múddeleriniń erteńgi qorǵaýshylary, barlyq adamgershilik, progressıvti jáne jasampazdyqtyń tasymaldaýshylary - ata-analarǵa, qoǵam men memleketke júktelgen jalpyǵa ortaq amanat. Sondyqtan partııa otbasy ınstıtýtyn nyǵaıtýǵa, balalardy tárbıeleý júıesin jetildirýge, eldegi ana men bala quqyqtaryn qorǵaýǵa erekshe kóńil bóledi.
Jetinshiden, «AMANAT» - bul halyqtyń memleketti basqarýdaǵy senimi. Parlament pen máslıhattarda Konstıtýsııalyq kópshiligi bar, Úkimetti quratyn bıleýshi partııa retinde bizdiń partııa azamattardyń ómirin jaqsartý, eldiń órkendeýi jáne damyǵan elderdiń qataryna kirý úshin barlyq jaǵdaıdy jasaıdy. Bul jolda biz Prezıdenttiń memlekettik baǵytyn jáne onyń bastamasymen qolǵa alynǵan qoǵamdyq-saıası jáne áleýmettik-ekonomıkalyq reformalardy tolyq qoldaımyz. О́z saılaýshylarynyń senimin jeńip alý, saqtaý jáne aqtaý – biz úshin amanat.
Budan basqa, «AMANAT» termıni qazaq, orys, aǵylshyn jáne basqa da tilderde birdeı ońaı oqylady, eń bastysy, onyń kıeli máni bar. «AMANAT» - tarıhı jáne saıası sabaqtastyqtyń sımvoly retinde, eń aldymen ózgerister men jańarýdy bildiretin múldem jańa bastama. Jańartylǵan partııa jańa ataýǵa saı keletinine senimdimin.
Barshańyzdy Alǵys aıtý kúnimen quttyqtaımyn! Halyq pen memleket ıgiligi jolyndaǵy eńbekterińiz úshin rahmet!», dep jazdy Ashat Oralov.