Mańǵystaýlyq oqýshylar 18-23 sáýir aralyǵynda ótken respýblıkalyq pándik olımpıadanyń qorytyndy kezeńinde 44 júldeli oryn aldy, dep habarlaıdy Egemen.kz.
Olardyń 9-y – birinshi, 15-i – ekinshi, al 20-sy – úshinshi oryn. Osylaısha Respýblıkalyq pándik olımpıadanyń qorytyndy esebi boıynsha Mańǵystaý oblysy rekord ornatty.
Respýblıkanyń barlyq oblys ortalyqtary men Nur-Sultan, Almaty jáne Shymkent qalasynda elektrondy formatta uıymdastyrylǵan bilim dodasynda 2070 oqýshy baq synady.
– Bıylǵy oqý jylyn mańǵystaýlyq oqýshylar óte jaqsy kórsetkishtermen aıaqtap otyr. Sonyń ishinde pándik olımpıadanyń sheshýshi kezeńine qatysqan 91 oqýshynyń 44-i úzdikter qatarynan kórindi. Byltyr olar 29 ǵana medal ıelengen. Bıyl óńirden qatysqan olımpıadashylarymyz hımııa, Qazaqstan tarıhy, aǵylshyn tili, qazaq tili men ádebıeti sııaqty pánder boıynsha top jardy, – dedi Aqtaý qalasy «Daryn» respýblıkalyq ǵylymı-praktıkalyq ortalyǵynyń dırektory Nesibeli Qýatova.
Eske sala ketsek, 16 pán boıynsha uıymdastyrylǵan olımpıadanyń mektepishilik kezeńine respýblıkanyń 6 362 bilim berý uıymdarynan 266 805, aýdandyq kezeńge 96 443, al oblystyq kezeńine 14 369 oqýshy qatysty. Olımpıadanyń ashyqtyǵy men akademııalyq adaldyǵyn saqtaý maqsatynda ótkizý barysy onlaın rejımde beınebaqylaý júıesimen qamtamasyz etilip, múddeli emes «úshinshi tulǵalar» shaqyryldy.