Elordadaǵy Ulttyq akademııalyq kitaphanada belgili jazýshy, halyqaralyq «Alash» ádebı syılyǵynyń laýreaty Qýanysh Jıenbaıdyń jetpis jyldyq mereıtoıyna oraı «Araldyń aqjal tolqyny» atty kitaptyń tanystyrylymy ótti, dep habarlaıdy Egemen.kz.
Mazmundy is-sharada ádebıet álemine ótken ǵasyrdyń sekseninshi jyldary óz únimen kelip, sodan beri eleýli eńbek etip, tórt roman, birneshe povest pen áńgime jazǵan talantty prozashy shyǵarmashylyǵy týraly Qazaqstan Prezıdentiniń keńesshisi Baýyrjan Omaruly, Parlament Májilisiniń depýtaty Saýytbek Abdrahmanov, Marat Májıtov, Mádı Aıymbetov, Qýandyq Túmenbaı, Súleımen Mámet, Sharhan Qazyǵul, Amantaı Shárip, Aıgúl Kemelbaeva jáne t.b. qalamgerler sóz alyp, parasatty oı órbitti. Kesh tizginin tanymal satırık Kópen Ámirbek ustady.
Is-shara barysynda jazýshy, Memlekettik syılyqtyń laýreaty Aldan Smaıyl sýretkerdiń «Jer ústinde de jumaq bar» romanyndaǵy Baıqońyr tragedııasyna toqtala kelip: «Men bul tragedııany bala kúnimnen bilemin. Sonyń saldarynan bir jyldary Arqa dalasynda kıikter jappaı qyrylyp qaldy. Qýanyshty Baıqońyr tragedııasyn qalamyna arqaý etken birden-bir jazýshy dep baǵalaımyn. Bul ózekti máseleni qalaı sheshemiz dep, oǵan memlekettik deńgeıde nazar aýdarylý qajet. Onyń osy problemany kótergen romany da óziniń laıyqty baǵasyn alǵan joq», dese, jazýshy Álibek Asqarov: «Qalamger qaýymynda ishteı bir týysqandyq, janashyrlyq bolady. Sonyń ishinde qurdastardyń orny bólek. «Qýandyq ne jazyp júr?», «Qýanysh ne istep jatyr?» dep eleńdep turamyz. Bizdiń aldymyzdaǵy býyn ádebıettiń de, shyqqan kitaptarynyń da qyzyǵyn kórdi. Al biz «endi durystap kitap jazaıyq» degende «qaıta qurýǵa» tap kelip, qalamymyzdy kóp silteı almaı qaldyq. Osy turǵydan kelgende Qýanysh ónimdi eńbek etip, aq paraq pen qalamyna adal boldy», dedi.
Sondaı-aq Qazaqstan Jazýshylar odaǵy tóraǵasynyń birinshi orynbasary, aqyn Aqberen Elgezek te sóz alyp, Odaq atynan mereıtoı ıesine syı-qurmet kórsetti.
Aıta keteıik, jańa jınaqqa qarymdy qalamgerdiń shyǵarmashylyq portreti týraly esseler, maqalalar jáne suhbattar toptastyrylǵan.