«Qaırat» – 19 dúrkin chempıon!

Bıylǵy el birinshiliginiń fınalynda Rýdnyıdyń «Aıaty» men Almatynyń «Qaıraty» tórtinshi márte kezdesti. Buǵan deıin eki klýb fýtzalshylary el chempıonatynyń 2016, 2017 jáne 2019 jylǵy maýsymynyń fınalynda kezdesip, bárinde «Qaırattyń» mereıi ústem bolǵan edi. «Aıat» óz tarıhynda alǵash ret 1999 jyly Qazaqstan chempıo­ny atanǵan bolatyn. Fınalda burynǵy Ońtústik Qazaqstan oblysynyń (qazirgi Túrkistan oblysy – red.) «Temirlan» komandasynan basym túsken bolatyn.

Bıylǵy fınalda eki ujym araǵa eki jyl salyp qaıta jo­lyqty. Fınaldyq básekeniń al­ǵashqy eki oıyny Almatyda ótip, ekeýinde de alań qojaıyndary jeńiske jetti. «Qaırat» pen «Aıat»  arasyndaǵy birinshi match asa tartysty ótkenimen, kezdesý sońynda almatylyqtar báribir 4:2 esebimen jeńisti julyp aldy. Kezdesýdiń birinshi bóliginde «Aıat» fýtzalshylary «Qaıratqa» laıyqty qarsylyq kórsetti – 1:1. «Qaırat» sapynan Edson dos Santos mergendigimen kózge tússe, Danıl Karpıýk tarazy basyn teńestirgen-di. Degenmen ekinshi 20 mınýttyqta qonaqtar sol qarqynyn ustap tura almady. Ekinshi taımda almatylyqtardan Karlos Sanz bir gol soqsa, Dáýren Tur­saǵulov dýbldiń avtory atan­dy. Alań ıeleriniń úsh golyna qonaq­tardan Ábdirasýl Ábdi­ma­nap­uly tek bir ǵana golmen jaýap qaıtardy.

Ertesi kúni ótken ekinshi match­ta da «Aıat» fýtzalshylary «Qaı­­rattyń» qarqynyna tótep bere almady – 7:2. Jyl basynda Qazaq­stannyń azamattyǵyn alyp, Eýropa chempıonatynda el namysyn qorǵaǵan almatylyqtardyń  brazılııalyq oıynshysy Edson birinshi taımnyń ózinde-aq het-trık jasap, kezdesýdiń taǵ­dyryn bir ózi sheship tastady. Ekinshi taımda qarqynyn odan ári kúsheıtken «Qaırat» «Aıat» qaq­pasyna taǵy tórt gol soqty. 21-mınýtta «Qaırattyń» brazı­lııalyq legıoneri Dıego Dáýren Tursaǵulovtyń pasynan keıin esepti 4:1-ge jetkizse, arada bir mınýt ótkende dýbldiń avtory atandy. Alań ortasynan qar­sylasynan dopty ońaı tartyp alǵan Aleshandre Dıego qaqpashymen birge-bir shyǵyp, aılasyn asyryp ketti – 5:1. Matchtyń aıaǵyna deıin «Qaırat» oıynshylary taǵy eki márte mergendik tanytty. 28-mınýtta Dáýren Tursaǵulov sol aıaǵymen qaqpanyń sol jaq buryshyn dál kózdese, 39-mınýtta Albert Aqbalyqov bos qalǵan qaqpaǵa gol soqty. Bul kezde «Aıattyń» bas bapkeri qaqpashynyń ornyna alańǵa besinshi oıynshyny shyǵarǵan edi. Bul kezdesýde qonaqtar sapynda Anton Ryndın men Danıl Karpıýk gol jasady. 

Jeksenbi kúni ótken eki ujym arasyndaǵy úshinshi kezdesýde «Qaırat» fınaldaǵy oıyndar serııasyn ári qaraı sozbalaqtamaı, bar máseleni osy matchta sheship tastaýǵa tyrysty. Fınal erejesi boıynsha alǵash bolyp úsh márte jeńiske jetken komanda el chempıony atandy. Eger bul oıynda «Aıat» jeńiske jetkende, komandalar taǵy da bir match ótkizýi tıis edi. Degenmen almatylyqtar «á» degennen oıyn tizginin óz qoldaryna alyp, eki taımda alań ıeleriniń qaqpasyna tórt gol soǵyp, 4:2 esebimen jeńiske jetti. Sóıtip el tarıhyndaǵy 19-shy chempıondyǵyna qol jetkizdi.

Kezdesýdiń 5-mınýtynda byl­­tyrǵy chempıonattyń úzdik oıyn­shysy Dáýren Tursa­ǵulov sol qaptaldan bir qorǵaý­shyny al­dap ótip, dopty qaq­panyń to­ǵyzdyǵyna dál kózdedi – 1:0. Ara­da eki mınýt ótkende «Qaı­rat­­tyń» shabýylshysy Albert Aq­­ba­lyqov buryshta­madan asyr­­­ǵan dopqa birinshi jetip, tab­­lo­daǵy kórsetkishti 2:0-ge jet­kiz­di. Sodan keıin almaty­lyq­­­­tardyń qarqyny báseńdep, oıyn tizginin qarsylastaryna berip qoıdy. Nátıjesinde, match­tyń 10-mınýtynda Dáýren Tur­saǵu­lovtyń qateliginen keıin «Aıat­tyń» shabýylshysy Rosha Batıs­ta Leandrıno esep aıyr­ma­syn qysqartyp, sport keshe­nine jınalǵan jergilikti jankúıer­lerdi bir serpiltip tastady. Bi­rinshi taım sońyna deıin alań ıeleriniń esepte alǵa shyǵyp alatyn tamasha múmkindigi bolǵan edi. Alaıda «Aıat» fýtbolshylary alǵash penaltıden múlt ketse, keıinnen 10 metrlik aıyp dobynan gol soǵa almady. Igıtanyń erligi arqasynda «Qaırat» birinshi taımda eseptegi basymdyqty ózderinde saqtap qaldy. 

Ekinshi taımnyń alǵashqy be­sin­shi mınýtynda bıylǵy Eýro­pa chempıonatynyń úzdik surmer­geni Birjan Orazov «Qaırat­tyń» úshinshi golyn soqsa, altyn­shy mı­nýtta Karlos Sanz almaty­lyq­tarǵa jeńis syılady. Al ekin­shi taım­nyń orta tusynan aýǵan­da Da­nıl Karpıýk esepti 4:2-ge jet­kizdi.

Sóıtip fınalda «Aıattan» basym túsken «Qaırat» el chempıony atansa, batystyń eki komandasy – «Kaspıı» men «Aqtóbe» el birinshiliginiń qola júldesi úshin talas júrgizýde. Komandalar keshe serııadaǵy tórtinshi kezdesýin ótkizdi. Aqtaýda ótken birinshi oıynda qonaqtar 3:1 esebimen jeńis­ke jetken bolsa, ekinshi match­ta «Kaspıı» ese qaıtardy – 3:2. Al Aqtóbedegi úshinshi match­ta «Atyraý» 3:2 esebimen jeńis­ke jetip, jalpy serııada 2:1 nátıjesimen alǵa shyǵyp aldy. Bul jerde de eń birinshi úsh ret jeńiske jetken komanda qola júldeger atanady.