Tennısten juptyq syndaǵy Qazaqstannyń birinshi raketkasy Andreı Golýbev «Rolan Garros» jarysynan keıin birneshe kúnge Qazaqstanǵa keldi. Elge kelgen boıda jýrnalıstermen tildesken ol aldaǵy týrnırlerge daıyndyǵy men bıylǵy birinshi jarty jyldyqtaǵy nátıjelerine toqtalyp, aldaǵy josparlary týraly oıyn ortaǵa saldy.
– Andreı, elge qosh keldiń! 2022 jyldyń alǵashqy alty aıynda óziń qatysqan kumdaýyt korttaǵy ónerińe kóńiliń tola ma?
– Kóńilim tolady dep aıta almaımyn. Sebebi ózim josparlaǵan biraz jarysta táýir óner kórsete almadym. «Rolan Garrosqa» deıingi básekelerde de, Fransııa ashyq chempıonatynda da jankúıerlerimdi qýantýdy kózdegen edim. Biraq ol oıymdy júzege asyra almadym. Áıtpese, basty maqsatym – iri jeńisterge, tıtýldarǵa qol jetkizý edi. Degenmen ázirge tek Rımdegi «Masters» týrnıriniń jartylaı fınalyna deıin jetkenim kóńilge medeý bolyp tur.
– Biraz ýaqyt boıy fransııalyq Fabrıs Martenmen juptasyp, túrli saıystarǵa qatysyp júrsiń. Tennısshiler serigin aýystyrý, ózgertý kerek ekenin qaı ýaqytta túsinedi?
– Bul jerde eki tennısshiniń de birge jetken nátıjesine baılanysty ǵoı. Eger bir-birińmen til tabysyp, iri jetistikterge jetip jatsań, aıyrylmaýǵa tyrysasyń. Al kerisinshe, esh nátıje shyǵara almaı jatsań, basqa tennısshimen birge baq synap kórýge umtylasyń. Sondaı-aq keıde biraz ýaqyt birge oınaǵan serigińniń oıyn kestesi sol týrnırge sáıkes kelmeı qalsa, taǵy da jubyńdy aýystyrýǵa májbúr bolasyń. Mysaly, bireýi basqa týrnırde oınaǵysy kelse, ekinshisi ol jarysqa qatysqysy kelmeıdi degendeı. Juptyq tennıste mundaı sátter jıi kezdesedi.
– Juptyq synda birneshe seriktesiń boldy. Bir-birińe saı keletinderińdi qalaı bilesińder?
– Qaı tennısshiniń oıyn stıli ózińe jaqyn ekenin túrli jarystarda qarap, baqylap júremiz. Keıin kortta birge oınap kóremiz. Oıynymyz úılesip jatsa, ári qaraı da birge oınaı beremiz. Eger stılimiz sáıkes kelmese, keleside basqa seriktes izdep kóremiz.
– Al jekeleı synda ózińniń eń erekshe esińde qalǵan matchtaryń bar ma?
– Árıne, bar. Atap aıtar bolsam, Qazaqstan quramasy sapynda Devıs kýbogynda Shveısarııada Stanıslas Vavrınkamen, Chehııada Tomash Berdyhpen, Qazaqstanda belgııalyq Davıd Goffenmen besinshi sette 12-10 esebimen jeńgenimdi qalaı umytaıyn?! Jekeleı jarystarda da mundaı oıyndar kóp boldy. Mysaly, Gambýrgtegi dodanyń fınaly, Aýstralııada reseılik Mıhaıl Iýjnyımen bes setke sozylǵan match, Soderlıngpen bolǵan oıyn áli kúnge deıin esimde.
– Eki apta buryn juptyq reıtıngte jeke rekordyńdy jańarttyń. Rımdegi «Masters» týrnıriniń jartylaı fınalyna deıin jetip, nátıjesinde reıtıngte 21-orynǵa kóterildiń. Qazir 22-satydasyń. Maýsym sońyna deıin TOP-10 tennısshiniń qataryna qosylýǵa múmkindik bar ma?
– Juptyq synda bul nátıjege qol jetkizýge ábden bolady. Jyl sońyna deıin aldyma ondyqtyń qataryna enýdi maqsat etip qoıdym. Ol úshin ár jarysta tabysty óner kórsetýim kerek.
– Qazaqstan quramasy sapynda Devıs kýbogynda 14 jyl boıy oınap kelesiń. El namysy synǵa túsken ár oıynda erekshe sezimge bólenesiń be, álde ondaıǵa úırenip kettiń be?
– Ulttyq qurama úshin birinshi ret, álde besinshi, tipti jıyrmasynshy ret oınap jatsam da, jaýapkershilik júgi eshqashan jeńildegen emes. Tek Devıs kýbogynyń jańa formatyna qatysty aıtarym bar. Beıtarap aımaqta úsh komandaǵa qarsy oınaý ońaı emes. Degenmen qarsylasymyz Ulybrıtanııa, Norvegııa nemese Ispanııa bolsyn, biz qazaqstandyq jankúıerlerdiń qoldaýyn ár kez sezinemiz.
– Bıyl Qazaqstan tennısi úshin erekshe jyl bolmaq. О́ıtkeni erler quramasy Devıs kýbogynyń, áıelder quramasy Bıllı Djın Kıng kýbogynyń jáne 14 jasqa deıingi jasóspirimder quramasy álem chempıonatynyń fınalynda óner kórsetedi. Bıylǵy Devıs kýbogynda Qazaqstan Ulybrıtanııa, AQSh, Nıderland sekildi myqty quramalarǵa tap boldy. Osy aıtýly jarystan ne kútesiń?
– Árıne, kez kelgen jarystyń fınaldyq kezeńinde ońaı qarsylastar túspeıtini anyq. Alǵashqy eki quramany aıtpaǵannyń ózinde, Nıderland tennısshilerimen budan birneshe jyl buryn kezdeskenbiz. Biraq qazir olardyń deńgeıi ósti, burynǵydaı emes. Jekeleı synda TOP-60-qa kiretin eki oıynshysy bar. Juptyq synda da osal emes.
– Aldaǵy «Ýımbldon» dodasyna deıin qandaı jarystarǵa qatysýdy josparlap otyrsyń?
– Ázirge «Ýımbldonǵa» qatysý-qatyspaýym belgisiz bolyp tur. О́ıtkeni Kásipqoı tennısshiler qaýymdastyǵy (ATR) «Ýımbldonda» jeńis úshin beriletin upaılardy alyp tastady. Sondyqtan bul dodaǵa qatyspaýym ǵajap emes. Bálkim, bul aralyqtaǵy ýaqytty qalpyma kelý úshin jumsaıtyn shyǵarmyn. Odan keıingi dodalarǵa qatysý úshin de kúsh kerek qoı. Degenmen kógaldaǵy tósenish maýsymynda Germanııadaǵy Galle ATR 500 jáne Ispanııadaǵy Malorka ATR 250 týrnırlerinde baq synaıtynym anyq. Qalǵanyn ýaqyt kórsetedi.
– Áńgimeńe rahmet.
Áńgimelesken
Álı BITО́RE,
«Egemen Qazaqstan»