Qazaqstan Halyq partııasynyń tóraǵasy Ermuhamet Ertisbaev Qazaqstan Respýblıkasy Konstıtýsııasyna engizilgen túzetýler boıynsha respýblıkalyq referendýmnyń qorytyndysyna qatysty resmı málimdeme jasady.
«Halyq partııasy birden qoǵamdaǵy ıdeıalyq kúreske qosylyp, referendýmdy qoldaý úshin aýqymdy úgit-nasıhat jumysyn júrgizdi. Biz nátıjege rızamyz jáne bul – barlyq qazaqstandyqtyń jeńisi dep sanaımyz. Qazaqstandyqtar is júzinde Prezıdent Q.Toqaevqa zor senim bildirdi. Jańa, Ádiletti Qazaqstannyń berik konstıtýsııalyq irgetasy qalandy dep aıtýǵa bolady», dedi partııa tóraǵasy sóz basynda.
«Qazaqstan Halyq partııasy jer men tabıǵı resýrstardyń menshik ıesi memleket emes, halyq bolýy kerek degen bastamasyn resmı túrde jarııalap, Konstıtýsııaǵa engiziletin túzetýlerdi ázirleý jónindegi jumys tobyna joldady. Halyq partııasynyń túzetýi qabyldandy. Bul túzetýdiń áleýmettik ádilettilikti qalpyna keltirý úshin mańyzy zor. Referendýmnan keıin qazaqstandyqtardyń aldynda turǵan basty mindet – Konstıtýsııanyń qabyldanǵan normasyn zańnamalyq jáne tájirıbelik turǵyda iske asyrý», dep atap ótken ol halyqtyq partııa barlyq memlekettik kompanııany, birinshi kezekte «Samuryq-Qazyna» qoryn sheneýnikterdiń qolynan tikeleı jáne dereý halyqtyń menshigine berý qajet dep sanaıtynyn atap ótti. О́ıtkeni «Úkimet memlekettik aktıvterdi tıimdi basqara almaıdy. «Samuryq-Qazyna» qorynyń dıvıdend tólegennen bıýdjetten aqsha alǵany áldeqaıda kóp. Biz, Qazaqstan Halyq partııasy «Jer jáne jer qoınaýy halyqqa tıesili», degen konstıtýsııalyq normany iske asyrý jónindegi halyq zańyn jarııa túrde ázirleýdiń bastalǵanyn málimdeımiz. Biz bul bastamaǵa beıjaı qaramaıtyn azamattardy, ásirese zańgerlerdi, ekonomısterdi, qarjygerlerdi zańnyń jazylýyna atsalysýǵa úndeımiz. Biz Amanat, «Aq jol» partııalaryn, sondaı-aq parlamenttik emes, onyń ishinde áli tirkelmegen partııalardy da halyqtyq zańdy ázirleý jónindegi birlesken jumysqa qatysýǵa shaqyramyz. Nátıjeli jumystyń qorytyndysynda árbir qazaqstandyq halyq menshiginen tikeleı kiris, atap aıtqanda, memlekettik kompanııalardan dıvıdend alady dep sanaımyz. Zań ádiletsiz jekeshelendirýdiń nátıjelerin qaıta qaraý mehanızmin jáne mundaı aktıvterdi olıgarhtardyń qolynan halyqtyń menshigine qaıtarýdy qarastyrýǵa tıis», degen E.Ertisbaev ózge partııalardy jumyla jumys atqarýǵa shaqyrdy.
Sonymen qatar ol: «Konstıtýsııaǵa engizilgen ózgeristerge baılanysty jáne jańa zań ázirlengenge deıin biz Úkimetten memlekettik kompanııalardy jekeshelendirýdi toqtatýdy talap etemiz. Bıyl jáne aldaǵy jyldary «QazMunaıGaz», Air Astana, QazaqGaz jáne t.b. qosa alǵanda «Samuryq-Qazyna» qory shamamen 40 kásiporyndy jekeshelendirýge shyǵarýdy josparlap otyr. Qazirgi jaǵdaıda olar arzan baǵamen satylady. Bul halyqty shyǵynǵa ushyratady. Halyqtyń aktıvi qaıtadan olıgarhtarǵa oralmaýy kerek. Buǵan qosa jyl sońyna deıin shetelge zańsyz áketilgen, halyqtyń menshigi bolýǵa tıis qarajatty elge qaıtarý qajet. Bul shamamen 140 mlrd AQSh dollary», dep málimdedi. Sóz sońynda «Árbir qazaqstandyq elimizdiń baılyǵynan paıda tabýy úshin Ádiletti Qazaqstandy birge quryp, halyq menshigin birlesip basqaraıyq», dedi partııa tóraǵasy.