QR Premer-Mınıstriniń birinshi orynbasary Roman Sklıar Májilis depýtattarynyń saýalyna joldaǵan jaýabynda jer úıde jıi kezdesetin órtterdiń negizgi sebebin atady, dep habarlaıdy Egemen.kz.
«Iis tııýge baılanysty, sonyń ishinde balalar arasynda qaıǵyly jaǵdaılardyń jıilep ketýiniń sebebi gazdy turmysta durys paıdalanbaýdan bolady. Jeldetý kanaldary men tútik júıesine qoıylatyn talaptarǵa turǵyndardyń kóbi nemquraıdy qaraıdy», dep jazdy Roman Sklıar depýtattyq saýalǵa joldaǵan jaýabynda.
Vıse-premer «Gaz jáne gazben jabdyqtaý týraly» QR Zańynyń 7-baby boıynsha gazdy turmysta paıdalanýdyń qaýipsizdigin jergilikti atqarýshy organdar baqylaıtynyn aıtady. «Búgingi tańda óńirlerde QR Ulttyq ekonomıka mınıstriniń 2015 jylǵy 20 naýryzdaǵy №241 buıryǵymen bekitilgen Turǵyn úı ınspeksııasy týraly úlgilik erejege sáıkes gazben jabdyqtaý júıeleriniń obektilerin qaýipsiz paıdalaný talaptaryn saqtaýyna memlekettik baqylaýdy jáne qadaǵalaýdy júzege asyratyn turǵyn úı ınspeksııalary quryldy. Sonymen birge gazben jabdyqtaý obektilerin qaýipsiz paıdalaný talaptarynyń saqtalýyn qadaǵalaý maqsatynda turǵyn úı ınspeksııalary Ákimshilik quqyq buzý týraly kodekstiń 729-babyna sáıkes ákimshilik isterdi qaraıdy», delingen Roman Sklıardyń jaýabynda.
Onyń aıtýynsha, gaz tutynýshy júıelerge kórsetiletin qyzmettiń ishine tútikter men jeldetý kanaldarynyń, aralyq qubyrlardyń aqaýsyz jumys isteýin, peshke aýanyń jetkilikti kirýin tekserý sharalary da kiredi. Biraq tútikter men jeldetý kanaldaryn tazalaý bul qyzmettiń ishine kirmeıdi.
«Úı ishindegi gaz qondyrǵysyn jóndeý jumystaryn jáne tıptik kelisimshartta kózdelmegen jumystardy tapsyrys berýshiniń ótinimi boıynsha mamandandyrylǵan uıym aqyly negizde atqarady», dep túsindirgen Úkimet basshysynyń birinshi orynbasary.