Úshinshi jeńisten de úmittimiz

Keıingi jyldary Belarýs fýtbolshylary Qazaqstan quramasynyń halyqaralyq týrnırlerdegi turaqty ári yńǵaısyz qarsylasyna aınaldy. О́ıt­keni eki eldiń fýtbolshylary bú­ginge deıin jasyl alańda bes márte kez­desip, tórt resmı oıynnyń bárinde Bela­rýs quramasy jeńiske jetken. Tek bir ǵana joldastyq match­ta jerlesterimiz qar­sylastarymen teń oınady.

Qazaqstan men Belarýs quramala­ry eń alǵash 2010 jyly Ońtústik Afrıka Respýblıkasynda ótken álem chempıonatynyń irikteý kezeńinde bir topta óner kórsetse, keıinnen Ult­tar lıgasynyń ekinshi maýsymynda «S» tobynda qarsylas atandy. Endi, mine, bıyl dál osy Ulttar lıgasy­nyń úshinshi maýsymynda da «eski tanystardyń» joldary qaıta túıisti.

Komandalar alǵash ret 2009 jyldyń 1 sáýirinde 2010 jylǵy álem chempıonatynyń irikteý matchynda jolyqty. Almatydaǵy Or­talyq stadıonda ótken kezdesýdiń esebin 10-mınýtta Renat Abdýlın ashqanymen, ekinshi taımda Aleksandr Gleb bastaǵan «aqorystar» Davıd Lo­rııa qorǵaǵan qaqpaǵa bes gol soǵyp, iri eseppen jeńiske jetti – 5:1. Qa­rymta kezdesý sol jyldyń 10 qaza­nynda Brestte ótip, alań ıeleri bul joly da iri eseppen basym tústi – 4:0.

2011 jyldyń aqpan aıynda Túr­­kııanyń Antalııa qalasynda eki qurama fýtbolshylary joldastyq match ót­kizip, 1:1 esebimen teń oınady. Bi­rin­shi taım­nyń 45-mınýtynda Alek­sandr Gleb penaltıden gol soqsa, ekin­shi taımnyń 90-mı­nýtynda Sergeı Ostapenko tarazy basyn teńestirdi. Osy oıynda Qazaqstan ulttyq qura­masynyń tarıhyndaǵy eń úzdik fýt­­bolshylardyń bir shoǵyry óner kór­setti. Atap aıtar bolsaq, Samat Sma­qov, Davıd Lorııa, Andreı Kar­po­vıch, Nurbol Jumasqalıev, An­dreı Fı­nonchenko, Azat Nurǵalıev, Sergeı Skoryh Belarýs quramasymen oıyn­da alańǵa shyqty. Sondaı-aq bul che­hııalyq jattyqtyrýshy Mıroslav Be­ranektiń ult­tyq quramadaǵy al­ǵashqy matchy bolatyn.

Arada toǵyz jyl ótkende Qazaq­stan quramasy (2020 jyly) Belarýs fýtbolshylarymen Ulttar lıgasy aıasynda eki kezdesý ótkizip, ekeýinde de jeńilip qaldy. Qyrkúıekte Al­ma­tydaǵy Ortalyq stadıondaǵy al­ǵashqy matchtyń ekinshi taımynda qonaqtar sapynan Maksım Bordachev esep ashsa, araǵa sanaýly mınýttar salyp Abat Aıymbetov tarazy basyn teńestirgen edi. Alaıda kezdesýdiń aıaqtalýyna birer mınýt qalǵanda Ǵafýrjan Súıimbaevtyń óreskel qateliginen keıin Belarýs quramasynyń shabýylshysy Vıtalıı Lısakovıch gol soǵyp, jeńisti julyp alǵan bolatyn – 2:1.

Araǵa bir aı salyp Mınskide ót­kizilgen jaýapty kezdesýde de alań ıeleri basym tústi – 2:0. Barlyq sta­tıs­tıkalyq kórsetkish boıynsha Mı­hal Bılek shákirtteri alda bolsa da, syrt alańda jeńiske jete almady. Onyń ústine, densaýlyqtaryna baılanysty Belarýske ulttyq quramanyń negizgi oıynshylary Aleksandr Ma­roch­kın, Iýrıı Persýh, Nuraly Álip, Iаn Vorogovskıı barǵan joq.

Endi búgin eki qurama Ulttar lıgasy aıasynda taǵy bir kezdesý ótkizbek. Alǵashqy eki týrda Ázerbaıjan men Slovakııa quramalaryn qapy qal­dyr­ǵan qazaqstandyq fýtbolshylar­dan jankúıerler jeńis kútetini anyq. Bálkim, ulttyq quramanyń Bela­rýs­pen bolǵan jeńissiz serııa­syna Mogamed Adıev núkte qoıar. Fýt­bol­shylar da buǵan deıin ketken eseni osy joly qaıtarý úshin baryn salýy kerek. Áıteýir, jankúıerler úshinshi jeńisten de úmitti.

Belarýs fýtbolshylary úshin Ulttar lıgasynyń bıylǵy maýsy­my asa sátti bastala qoıǵan joq. Al­­ǵashqy týrda Slovakııadan 1:0 ese­bi­men jeńilse, ekinshi týrda Ázer­baıjan quramasynyń qaqpasyna gol sala alǵan joq – 0:0. Belarýs qura­masynyń tiz­ginin ekinshi ret (2011 – 2014 jyldary jáne 2021 jyldan búginge deıin – red.) ustaǵan Georgıı Kondratev maýsym aıyn­daǵy oıyndarǵa qazaqstandyq jan­kúıerlerge jaqsy tanys «Astana» klýbynyń jartylaı qorǵaýshysy Maks Ebong pen «Maqtaaral» koman­dasynyń qorǵaýshysy Rýslan Iýden­kovty shaqyrǵan.