Boksshylarymyz AQSh-ta atoı saldy

Máselen, qazaqstandyq Suleimen Promotions kompanııasy áýesqoı boks­ta birtalaı bıik belesti baǵyndyrǵan, álem jáne Azııa birinshilikterinde atoı salǵan talantty jigitterdi óz qam­qorlyqtaryna alyp, óreli óren­derdi kezeń-kezeńimen álemdik deń­geıdegi shoýlarǵa qatystyra bastady. Promoýterliktiń quramynda ekinshi orta salmaqtaǵy WBA International, WBO Global jáne WBC Asian bel­diginiń ıegeri Aıdos Erbosynuly (16-0, 11 KO), áýesqoı bokstan 2018 jylǵy Azııa chempıony Bek Nur­maǵanbet (7-0, 5 KO), 2017 jylǵy álem birinshiliginiń kúmis júldegeri, Tokıo Olımpıadasyna qatysqan Ábilhan Amanqul (1-0, 1 KO), jas­tar arasyndaǵy álem (2014 jyl) jáne Olımpııa oıyndarynyń chempıo­ny (2014), eresekter arasyndaǵy álem birinshiliginiń úsh dúrkin qola júl­degeri Abylaıhan Júsipov (2-0, 1 KO), Evgenıı Pavlov (7-0, 5 KO) sekildi boksshylar bar.

Jýyrda esimderi keıin atalǵan tórt boksshy kásibı bokstyń «Mek­kesi» sanalatyn AQSh-ta kezekti jekpe-jekterin ótkizip, barlyǵy da qarsylastaryn merziminen buryn sula­typ saldy. Mınneapolıs (Mınnesota shta­ty) qalasynda Tom Brown (TGB Promotions) kompanııasynyń uıym­dastyrýymen ótken boks keshiniń anderkardynda sharshy alańǵa shyqqan otandastarymyz úshin bul AQSh-taǵy alǵashqy aıqastary edi. Keshtiń basty jekpe-jeginde amerıkalyq boksshylar – Stıven Fýlton men Danıel Roman ekinshi jeńil salmaqta WBC jáne WBO belbeýin sarapqa salyp, alǵashqysy 12 raýndtyń qorytyndysy boıynsha tóreshilerdiń biraýyz sheshimimen jeńiske jetti.

Negizgi jekpe-jekke deıin qazaq­standyq boksshylardan birinshi bolyp sharshy alańǵa Ábilhan Amanqul shyqty. Orta salmaqta (72,5 kg) debıýtti jekpe-jegin ótkizgen qandasymyz kásipqoı boksqa jýyrda ǵana aýysyp, alǵashqy aıqasynda qarsylasyn no­kaýt­pen jeńgen 25 jastaǵy amerıkalyq Devont Makdonaldpen sheberlik baıqasty. Tórt raýndqa josparlanǵan kezdesýdiń úshinshi raýndynda qazaq­standyq boksshy qarsylasynyń búıi­rinen aýyr soqqy jasap, nokaýtqa ji­berdi. Amerıkalyq jekpe-jekti qaıta jalǵastyrýǵa tyrysqanymen tóreshi oǵan múmkindik bermedi.

Sharshy alańǵa ekinshi bolyp áýes­qoı boksta ulttyq quramanyń kapıtany bolǵan Abylaıhan Júsipov kóterildi. Birinshi orta salmaqtaǵy (69,9 kg) otandasymyz búginge deıin 40 jekpe-jek ótkizip, onyń 18-inde qarsylasyn jeńip, 21 márte jeńilgen jáne bir kezdesýinde teń túsken mek­sıkalyq Edgar Ramırestiń ataq-dań­qyna qaramaı, birinshi raýndta-aq sulatyp saldy. Bul – A.Júsipovtiń kásipqoı bokstaǵy ekinshi jekpe-jegi jáne merziminen buryn qol jetkizgen ekinshi iri jeńisi.

Al sýper orta salmaqta óner kór­setetin (76,2 kg) qazaqstandyq Bek Nurmaǵanbet te áriptesteriniń de, óziniń de jeńisti jolyn sátti jalǵady. Toǵyz jekpe-jektiń jeteýinde (alty qarsylasyn merziminen buryn utqan) jeńiske jetip, eki aıqasynda jeńilip qalǵan amerıkalyq boksshy Haınell Ýıler otandasymyzǵa nebári eki raýnd qana qarsylyq kórsetýge shamasy jetti. Ekinshi úsh mınýttyqtyń orta tusyna kelgende Bek qarsylasyn oń qolynyń aýyr soqqysymen qulaq shekeden uryp qulatty. Sonymen qatar ekinshi jeńil salmaqta (55,3 kg) judy­ryqtasqan taǵy bir qazaqstandyq boksshy Evgenıı Pavlov meksıkalyq Aleksıs Salıdony ekinshi raýndta nokaýtqa túsirdi.

Jigitterdiń AQSh-taǵy jarqyn jeńisteri óz salmaǵyndaǵy álemdik reıtıngtegi oryndaryna da aıtarlyq­taı áser etti. Atap aıtar bolsaq, je­tinshi jeńisine qol jetkizgen Ev­genıı Pavlov óz salmaǵyndaǵy 1 300 boks­­shynyń ishinde 62-orynǵa kó­te­­rilse, dál sondaı jeńisi bar Bek Nur­maǵambet 72-orynǵa (1 400 boks­shy) jaıǵasty. Abylaıhan Júsipov ekinshi jeńisiniń arqasynda eki myń boksshynyń ishinde 418-orynǵa bir-aq kóterildi. Al debıýttik kezdesýin nokaýtpen aıaqtaǵan Ábilhan Amanqul á degennen 1 500 boksshynyń ishinen 600 saty joǵarylap, 900-orynǵa turaqtady.