Meksıkanyń Leon qalasynda uıymdastyrylǵan aýyr atletıkadan 17 jasqa deıingi jasóspirimder arasyndaǵy álem chempıonaty qazaqstandyq sportshylar úshin tabysty aıaqtaldy.
Muhıttyń arǵy betinde ótkizilgen dodada Qazaqstan quramasynyń toǵyz sportshysy óner kórsetip, sonyń jeteýi júldegerler qatarynan kórindi. Atap aıtqanda, Erasyl Sáýlebekov (67 kg), Edige Emberdi (73 kg), Denıs Polýboıarınov (81 kg) jáne Nıkıta Abdrahmanov (102 kg) Meksıkada Ánuranymyzdy shyrqatsa, Nadejda Lı (64 kg) kúmis, Erasyl Omarov (55 kg) pen Aleksandra Belenko (40 kg) álem chempıonatynyń qola júldesin jeńip aldy.
Osylaısha, bir aptaǵa jalǵasqan jasóspirimder arasyndaǵy álem chempıonatynda qazaqstandyq sportshylar tórt altyn, bir kúmis jáne eki qola medalmen jalpykomandalyq esepte top jardy. Sondaı-aq tórt altyn, bir kúmis jáne bir qola medal oljalaǵan Kolýmbııa sportshylary ekinshi orynǵa ıe bolsa, eki altyn, úsh kúmis, úsh qola júlde jeńip alǵan Túrkııa quramasy úzdik úshtikti túıindedi. Meksıkadaǵy chempıonatta barlyǵy 22 eldiń órenderi júldege ilikti.