Bul kúnderi Býrabaıda velosporttan erler men áıelder arasyndaǵy jekeleı jáne komandalyq estafeta boıynsha el chempıonaty ótip jatyr.
Jarystyń kezekti kúninde erler jekeleı jarysta baq synady. Eresekter arasyndaǵy básekede Astana Qazaqstan Team veloklýbynyń ókili Iýrıı Natarov úzdik nátıje kórsetip, Qazaqstan chempıony atandy. Natarov 30 shaqyrym joldy 37 mınýt 46 sekýndta júrip ótti. Máre syzyǵyn ekinshi bolyp ulttyq quramanyń ókili Igor Chjan kesti. Ol jeńimpazdan 51 sekýndqa qalyp qoıdy. Úzdik úshtikti Anton Kýzmın túıindedi.
Al 23 jasqa deıingi sportshylar arasyndaǵy básekede Astana Qazaqstan Development Team veloshabandozy Danııl Pronskıı top jardy. Atalǵan qashyqtyqty ol 39 mınýt 5 sekýndta baǵyndyrdy. Ekinshi jáne úshinshi oryndy Andreı Remhe (39 mınýt 47 sekýnd) jáne Aleksandr Vınokýrovtyń uly Nıkolaı Vınokýrov (40 mınýt 43 sekýnd) jeńip aldy.