Shaıbaly hokkeıden Qurlyqtyq hokkeı lıgasynyń (QHL) jańa maýsymy qyrkúıekte bastalady. Maýsymaralyq úziliske shyqqan QHL komandalary kelesi apta kezeń-kezeńimen oqý-jattyǵý jumystaryna kirisedi. Olardyń qatarynda elordanyń «Barysy» da bar. Resmı málimet boıynsha astanalyq hokkeıshiler 14 shildede elordada bas qosyp, maýsymnyń alǵashqy jıynyn «Barys Arenada» ótkizedi. Osy oraıda, «Barys» jańa maýsymǵa qalaı daıyndalady, klýbtyń transfer saıasaty qandaı, komandadan kimder ketti, jańadan qandaı oıynshylar keldi degen suraqtarǵa jaýap izdep kóreıik.
«Barystan» qandaı oıyn kútemiz?
Irgetasy 1999 jyly qalanǵan «Barys» hokkeı klýby 2004 jyly Reseı chempıonatynyń birinshi lıgasynda óner kórsetip, 2007 jyly joǵary lıgasynda joldama jeńip aldy. Bir maýsymnan keıin Qurlyqtyq hokkeı lıgasynyń turaqty qatysýshysyna aınaldy. 2008 jyly QHL-da alǵashqy maýsymyn ótkizgen «Barys» áne-mine degenshe bıyl turaqty birinshiliktiń 15-shi maýsymyna daıyndyǵyn bastaǵaly jatyr. Osy ýaqyt aralyǵynda elordalyq ujym Gagarın kýbogy jolynda jeti márte 1/8 fınalǵa, úsh ret shırek fınalǵa deıin jetti. QHL-da ár jyldary úzdik nátıje kórsetip, Chernyshev dıvızıonynda top bastaǵany jankúıerlerdiń esinde bolsa kerek.
Elordalyq klýb jańa maýsymǵa daıyndyǵyna resmı túrde 14 shildede kirisse de, komandadaǵy ishki aýys-túıis mamyr aıynda bastalyp ketti. QHL-dyń keıingi eki maýsymynda «Barysty» órge súırep, eki márte Gagarın kýbogynyń pleı-off kezeńine shyǵarǵan Iýrıı Mıhaılıs ótken aıda qyzmetinen ketip, ornyna esimi «Barys» jankúıerlerine jaqsy tanys Belarýs mamany Andreı Skabelka keldi. Iý.Mıhaılıs shaǵyn bıýdjetpen jáne qazaqstandyq hokkeıshilermen QHL-da nashar óner kórsetti dep aıta almaımyz. Al 2018-2020 jyldary «Barysty» baptap, QHL-da aıtarlyqtaı nátıjege qol jetkizgen Skabelka araǵa eki jyl salyp elordalyq klýbqa qaıta oraldy. Sol aralyqta ol Iаroslavltiń «Lokomotıv» klýbyn jattyqtyrǵanymen, «Barystaǵydaı» joǵary nátıje kórsete almady.
«Barysqa» kim kelip, kim ketpegen
Jasyratyny joq, QHL-dyń ózge komandalarymen salystyrǵanda, «Barystyń» transferge jaýapty mamandary óte nashar jumys isteıdi. Sózimizge eki aıdyń ishinde komandadan 15-ke jýyq hokkeıshiniń ketkeni jáne osy ýaqytta klýbqa nebári bir ǵana oıynshynyń kelgeni dálel bola alady. Al QHL-dyń ózge komandalary qazirdiń ózinde quramyn jasaqtap boldy. Endi alańsyz jańa maýsym aldyndaǵy jattyǵý jumysyna kirisedi. Al «Barysta» bári kerisinshe. Aldymen klýbta qalǵan sanaýly oıynshymen jattyǵýdy bastaıdy da, keıinnen eshbir klýbqa qajeti bolmaı qalǵan sheberligi nashar, oıyn tájirıbesi joq hokkeıshilerdi alyp, oıynshylar bir-birine úıreniskenge deıin QHL-dyń alǵashqy 10-15 matchynda jeńilip, jankúıerler aldynda uıatty bop jatady.
О́kinishke qaraı, byltyrǵy maýsym aıaqtala salysymen «Baryspen» kelisimsharty aıaqtalǵan sheteldik legıonerler men qazaqstandyq hokkeıshiler ketip qaldy. Atap aıtar bolsaq, qaqpashy Ionı Ortıo, qorǵaýshylar Olle Alsıng, Erık Martınsson, Djo Morroý, Valerıı Orehov, Roman Savchenko, shabýylshylar Iаkob Berglýnd, Lınden Veı, Kodı Kýnık, Iаkob Lılıa, Roman Starchenko, Tomash Iýrcho erkin agent retinde basqa komandalarǵa aýysty.
Ázirshe «Barys» 13 oıynshynyń ornyna bir ǵana jańa hokkeıshi aldy. О́tken maýsymda Magnıtogorskiniń «Metallýrgymen» birge Gagarın kýbogynyń fınalyna deıin jetken qorǵaýshy Mıhaıl Grıgorev endi aldaǵy maýsym «Barys» sapynda óner kórsetedi. M.Grıgorev 2012/13 jyldary «Barys» klýbynda oınaǵany bolmasa, jarqyrap kózge túsken emes.
Sondaı-aq elordalyq klýb ótken aptada shabýylshy Vladımır Mıhasenokpen 31 tamyzǵa deıin synama kelisimshart jasasqanyn habarlady. Iаǵnı hokkeıshi jattyǵý jıynynda jáne joldastyq oıyndarda bapkerlerdiń kóńilinen shyǵatyndaı oıyn kórsetse, kelisimshartyn ári qaraı uzarta alady. Byltyrǵy maýsymdy ol Habarovskiniń «Amýr» klýbynda bastap, keıin Chehııanyń «Beranı Zlın» klýbyna aýysqan bolatyn.
Jalaqydan týǵan daý
Keıingi bir-eki aptada qazaq koǵamynda «Barys» klýbynda óner kórsetetin qazaqstandyq shabýylshy Nıkıta Mıhaılıs pen kanadalyq Lınden Veıdiń jalaqylary kóp talqylandy. Resmı málimet boıynsha ótken maýsymda Mıhaılıs «Barystan» aı saıyn 32 mıllıon teńge, al Veı 40 mıllıon teńge jalaqy alyp otyrǵan. Olardyń bul jalaqyǵa laıyq, laıyq emestigin aıtpas buryn, hokkeıshilerdiń byltyrǵy maýsymdaǵy statıstıkasyna zer salyp kóreıik.
Máselen, Nıkıta Mıhaılıs byltyr «Barys» sapynda ótkizgen 52 oıynda 19 márte mergendigimen kózge túsip, 27 ret áriptesteriniń gol soǵýyna jaǵdaı jasaǵan. Al ótken maýsymdy SKA sapynda bastap, «Barysta» aıaqtaǵan Lınden Veı barlyǵy 46 matchta muzaıdynǵa shyǵyp, qarsylastar qaqpasyna nebári 11 shaıba soqqan. Sondaı-aq 9 márte áriptesterine dál pas bergen.
Al QHL-diń byltyrǵy maýsymdaǵy úzdik surmergeni Fılıpp Maıe («Metallýrg») 70 matchta 23 márte mergendik tanytyp, 37 shaıbaǵa assıstenttik jasaǵan. Onyń aılyq jalaqysy – 30 mıllıon teńgeniń shamasynda bolǵan. Osy sandardan keıin-aq qaı hokkeıshiniń óz nanyn adal taýyp júrgenin baǵamdaı berýge de bolady.
Jańa maýsymnyń jospary
Joǵaryda aıtyp ótkenimizdeı, «Barys» hokkeıshileri daıyndyqty 14 shildede bastaıdy. Bastapqy eki kún medısınalyq tekserýden ótip, 17 shildeden 15 tamyzǵa deıin «Barys Arenada» oqý-jattyǵý jıyndarynyń birinshi kezeńin ótkizedi. Al 16-20 tamyz aralyǵynda klýb dástúrli «Prezıdent kýbogy» jarysyna qatysady. Bul týrnırde «Barystan» bólek, Magnıtogorskiniń «Metallýrg», Ekaterınbýrgtiń «Avtomobılıst», Nıjnekamskiniń «Neftehımık» jáne Beıjińniń «Kýnlýn Red Star» klýbtary óner kórsetedi. Sodan keıin Reseıdiń Chelıabi qalasyna sapar shegedi. Bul jerde jerlesterimiz «Metallýrg», «Avtomobılıst» jáne jergilikti «Traktormen» birge Gýbernator kýbogyn sarapqa salady. QHL-dyń jańa maýsymy 1 qyrkúıekte bastalady.