Fýtboldan ÝEFA Chempıondar lıgasynyń bıylǵy irikteý kezeńinde baq synaǵan Qostanaıdyń «Tobyly» jarystyń kelesi aınalymyna shyǵa almady. Týrnırdiń alǵashqy irikteý satysynda Majarstannyń «Ferensvarosh» klýbymen kezdesken byltyrǵy el chempıondary eki oıyn qorytyndysy boıynsha iri eseppen jeńilip, Chempıondar lıgasyndaǵy joryǵyn bastamaı jatyp aıaqtady.
Osydan bir apta buryn Qostanaıdaǵy «Ortalyq» stadıonda ótken eki komanda arasyndaǵy birinshi oıynda jerlesterimiz óz jankúıerleriniń aldynda táýir oınaǵanymen, Majarstannyń 33 dúrkin chempıonyn jeńe almaǵan edi – 0:0. Bul – Chempıondar lıgasynyń irikteýine nebári ekinshi ret qatysyp jatqan qazaqstandyq komanda úshin jaqsy nátıje bolǵanymen, qonaqtar úshin sátsiz oıynnyń biri boldy. Sondyqtan Býdapeshttegi qarymta kezdesýde «Tobyldy» óte qıyn oıyn kútip turǵany anyq edi.
Kópshilik kútkendeı, 22 myń jankúıer syıatyn «Grýpama Arenadaǵy» match «Ferensvaroshtyń» goldar shoýymen bastaldy. Tóreshiniń ysqyryǵy shalyna salysymen alǵa qaraı umtylǵan alań qojaıyndary kezdesýdiń úshinshi mınýtynda óz degenderine jetip, matchtyń esebin ashty. Buryshtamadan asyrylǵan dopqa birinshi jetken shabýylshy Adama Traore «Tobyl» qaqpasyna baspen tamasha gol soqty. Bul soqqynyń aldynda «Tobyldyń» qorǵaýshylary da, qaqpashy Aleksandr Mokın de dármensiz qaldy. Negizi alań ıelerinde birinshi mınýtta-aq gol soǵatyn tamasha múmkindik bolǵan edi. Alaıda nıgerııalyq Tokmak Ngýennyń aıyp alańynyń ishinen tepken doby qaqpa mańdaıshasyna tıip, keri serpildi.
Shabýylyn sát saıyn údete túsken «Ferensvarosh» fýtbolshylary 17-mınýtta oıyndaǵy ekinshi golyn soqty. Bul joly da Malı ulttyq quramasynyń shabýylshysy Adama Traore mergendigimen kózge tústi – 2:0. Arada tórt mınýt ótkende Majarstannyń komandasy kezdesýdegi úshinshi golyn salyp, oıyn taǵdyryn birjola sheship tastady. Goldyń avtory – Aıssa Laıdýnı. Oǵan nátıjeli pasty buǵan deıin eki márte dáldik tanytqan Adama Traore shyǵaryp berdi. Qostanaılyqtar alań ıeleriniń tek úshinshi golyna ǵana jyldam jaýap qaıtara aldy. Oń qanattan shabýyldaǵan «Tobyldyń» serbııalyq jartylaı qorǵaýshysy Zoran Toshıch qarsylastyń birneshe oıynshysyn aldap ótip, Ivan Sergeevke tamasha pas shyǵaryp berdi. О́z kezeginde ózbekstandyq shabýylshy urymtal sátte múlt ketken joq – 3:1. Oıynnyń birinshi taımy osy eseppen aıaqtaldy. Úziliske deıin býdapeshttik komanda birneshe qaýipti shabýyl uıymdastyrǵanymen, Mokınniń qaqpasyna gol sala alǵan joq. Alǵashqy 45 mınýtta alań ıeleri «Tobyl» qaqpasyna 13 márte dál soqqy jasady.
Ekinshi taımda «Ferensvarosh» fýtbolshylary qarqynyn báseńdetkenimen, kezdesý sońyna deıin taǵy eki gol soǵyp ketti. 74-mınýtta Forchýn Bessı, 90-mınýtta Enrı Ýıngo tablodaǵy kórsetkishti 5:1-ge jetkizdi. Qostanaılyqtar esep aıyrmasyn qysqartamyz dep júrgende matchty áýpirimdep júrip 10 oıynshymen zorǵa aıaqtady. Ekinshi taımda alańǵa shyqqan jartylaı qorǵaýshy Serikjan Mujyqov aınaldyrǵan eki mınýttyń ishinde eki sary qaǵaz alyp, 81-mınýtta alańnan qýyldy. Osylaısha, Qostanaıdyń «Tobyly» syrt alańda Majarstannyń «Ferensvaroshynan» iri eseppen jeńilip, Chempıondar lıgasynyń irikteý kezeńinen shyǵyp qaldy.
Endi qazaqstandyq komanda Eýrokýboktaǵy oıyndaryn Konferensııa lıgasynyń ekinshi irikteý kezeńinen jalǵastyratyn boldy. Bul synda qostanaılyq klýb Gıbraltardyń «Lınkoln Red Imps» ujymymen kezdesedi. «Lınkoln» da «Tobyl» sııaqty bıylǵy Eýrododa oıyndaryn Chempıondar lıgasynyń irikteý kezeńinen bastap, alǵashqy aınalymda Makedonııanyń «Shkýpı» komandasynan jeńilip qaldy. Birinshi oıynda Gıbraltar komandasy 2:0 esebimen basym túskenimen, qarymta kezdesýde 3:0 esebimen qarsylastaryna jol berdi. Sóıtip «Lınkoln Red Imps» klýby da Konferensııa lıgasyna túsip qaldy.
46 jyldyq tarıhy bar komanda osy ýaqyt aralyǵynda Gıbraltar chempıonatynda 26 márte, el kýbogynda 16 ret top jarǵan. 2014/15 jylǵy fýtbol maýsymynan beri Eýrokýbok oıyndaryna turaqty qatysyp keledi. Byltyrǵy maýsymda olar Konferensııa lıgasynyń toptyq kezeńine deıin jetip, «Kopengagen», PAOK jáne «Slovan» klýbtarymen F tobynda óner kórsetti.
Eki klýb arasyndaǵy alǵashqy oıyn 21 shildede Qostanaıda, qarymta match 28 shildede Gıbraltarda ótedi.