Bul týraly Indýstrııa jáne ınfraqurylymdyq damý mınıstri Qaıyrbek О́skenbaev Telegram-daǵy kanalynda jazdy, dep habarlaıdy Egemen.kz.
Vedomstvo basshysynyń aıtýynsha, búgingi tańda áýe kóligindegi jolaýshylar sanynyń kóbeıgeni baıqalady. Bul óz kezeginde reısterdiń keshigýine ákep soǵyp, otandastarymyzdyń narazylyǵyn týdyryp otyr.
«Qalyptasqan máseleni jedel sheshý maqsatynda qazaqstandyq avıatasymaldaýshylarǵa jańa ushaqtar satyp alýdy tapsyrdym. Osylaısha, jyldyń sońyna deıin jalpy syıymdylyǵy 2,5 myń oryndy quraıtyn 14 jańa ushaq paıdalanýǵa beriletin bolady», dep jazdy mınıstr.
Sonymen birge áýe tasymaldaryna qatysty suranys jyldan jylǵa artyp kele jatqandyqtan, qazaqstandyq áýe kemeleri parki 2025 jylǵa deıin 51 birlikke ulǵaıatyn boldy. Jalpy reısterdiń keshigý faktileri boıynsha túsip jatqan shaǵymdardy eskere kele, IIDM basshysynyń tapsyrmasy boıynsha Azamattyq avıasııa komıteti men Qazaqstannyń avıasııalyq ákimshiligi tıisti tergeý amaldaryn bastap ketti.
Eger jolaýshylardyń quqyqtaryn buzý faktileri anyqtalsa, tıisti avıakompanııalar ákimshilik jaýapqa tartylatyn bolady.
Qazirgi ýaqytta jolaýshylardy 75 ushaq tasymaldaıdy. 2022 jyldyń jarty jylynda tasymaldanǵan jolaýshylardyń sany ótken jyldyń sáıkes kezeńimen salystyrǵanda 10%-ǵa ósken. Pandemııaǵa deıingi kezeńmen salystyrǵanda ósim 28 paıyzdy quraıdy.