Qostanaı oblysynda 200 mıllıon teńgege sapasyz jóndelgen bóget jyrylyp ketti. Ekonomıkalyq tergeý departamenti qarjy jymqyrý deregi boıynsha qylmystyq is qozǵady, dep habarlaıdy Egemen.kz.
Qostanaı oblysy boıynsha Ekonomıkalyq tergeý departamenti «Shıli bógetin kúrdeli jóndeý» jobasy kezinde bıýdjet qarjysyn jymqyrý deregi boıynsha QR QK-niń 189-baby 4-bóligi 2-tarmaǵy boıynsha qylmystyq is qozǵaǵan.
«Saraptama qorytyndysy boıynsha aldyn ala keltirilgen zalal 33 712 618 teńge boldy. Sot qylmysty uıymdastyrýshyǵa qatysty úıqamaqqa alý túrindegi bultartpaý sharasyn sanksııalady. Qazir qajetti tergeý áreketteri júrgizilip jatyr», dep habarlady departamenttiń baspasóz qyzmeti.
Buǵan deıin 2 jyl buryn salynǵan bógetti Shıli turǵyndary qaıta jóndeýdi suraǵan bolatyn. Gıdrotehnıkalyq qurylysty salýǵa respýblıkalyq bıýdjetten 200 mıllıon teńgege jýyq qarjy bólingenimen, jańa bóget kóktemgi sý tasqynyn bógeı almady.