Aldaǵy qazan aıynda elimizde tuńǵysh ret tennısten Astana Open ATP 500 týrnıri uıymdastyrylmaq. Bul týraly Qazaqstannyń tennıs federasııasy málimdedi.
ATP 500 týrnıri «Úlken dýlyǵa» sanatyna enetin tórt iri jarys pen ATP Masters 1000 dodalarynan keıingi úshinshi deńgeıdegi jarys bolyp esepteledi. Elordadaǵy tennısshilerdiń mańyzdy saıysy 1-9 qazan aralyǵynda Ulttyq tennıs ortalyǵynyń korttarynda ótedi.
«ATP-dyń Qazaqstanǵa osyndaı deńgeıdegi jarysty ótkizýdi senip tapsyrǵanyna qýanyshtymyz. Bul – elimizde tennısti damytý úshin álemdik ozyq tájirıbeni paıdalanýdaǵy baǵytymyzdyń durystyǵyn kórsetedi», dedi Qazaqstan tennıs federasııasynyń prezıdenti, Halyqaralyq tennıs federasııasynyń (ITF) vıse-prezıdenti Bolat О́temuratov.
Taǵy bir atap ótetin jaıt, qazirdiń ózinde Astana Open-ge álemdegi eń úzdik 10 tennısshiniń qataryna kiretin birqatar sportshy qatysýǵa nıet bildirip otyr. Olardyń qatarynda álemniń 1-raketkasy, AQSh ashyq chempıonatynyń jeńimpazy reseılik Danııl Medvedev bar.