Elordadaǵy Ulttyq tennıs ortalyǵynyń jazǵy hard korttarynda ATP Challenger Tour jáne ITF Women’s World Tennis Tour serııasyna enetin dástúrli «Prezıdent kýbogy» jarysy aıaqtaldy. Elimizdiń eń úzdik tennısshileri men álemdik reıtıngte alǵashqy 200-orynda turǵan sheteldik sportshylar sheberlik baıqasty.
Bir aptaǵa jalǵasqan týrnırdiń erler arasyndaǵy fınaldyq básekede almatylyq Denıs Evseev pen álemniń 151-shi, osy jarystyń 1-raketkasy reseılik Roman Safıýllın bas júldeni sarapqa saldy. Bul – álemdik reıtıngte 341-orynda turǵan 29 jastaǵy qazaqstandyq tennısshiniń karerasyndaǵy alǵashqy Chellendjer týrnıriniń fınaly bolatyn. Buǵan deıin ITF sanatyndaǵy eń tómengi Fıýchers jarystarynda top jaryp júrgen otandasymyz, ókinishke qaraı, Chellendjer dodasynda top jaratyn alǵashqy múmkindigin paıdalana almady.
Fınaldyq saıystyń birinshi partııasyn Denıs Evseev táýir bastap, segiz sette 6:2 esebimen jeńiske jetkenimen, ekinshi partııada R.Safıýllın ese qaıtaryp, tarazy basyn teńestirdi – 6:4. Al úshinshi, sheshýshi partııada reseılik sportshynyń taı-breıkte baǵy janyp, jeńisti julyp aldy – 7:6 (7:2). Osylaısha, Roman óz sporttyq jolynda ekinshi ret Chellendjer týrnırinde jeńimpaz atanyp, reıtıngtik 80 upaı men 7 200 AQSh dollary kóleminde syıaqyǵa ıe boldy. Fınalda jeńilip qalǵanyna qaramastan, Evseev dúısenbide jańartylatyn álemdik reıtıngte 341-den 269-orynǵa kóterildi.
Áıelder arasynda «Prezıdent kýbogy» aıasynda ótken ITF World Tennis Tour W60 dodasynda japonııalyq Moıýka Ýchıdjıma úzdik shyqty. Ol fınalda serbııalyq Natalıa Stefanovıchti utty – 6:3, 7:6 (7:2). Aıta keteıik, jyl saıyn dástúrdi túrde uıymdastyrylatyn elimizdegi eń bedeldi jarystardyń biri sanalatyn «Prezıdent kýbogy» týrnıri árqashan joǵary mártebege ıe. Bir jyldary bul jarysta álemniń eń úzdik tennısshileri, atap aıtqanda, Danııl Medvedev (ATP №1), Andreı Rýblev (ATP №8), Karen Hachanov (ATP №22), Mıomır Kesmanovıch (ATP № 30), Sebastıan Korda (ATP № 46), Maks Persell jáne basqa da kóptegen tanymal oıynshy óner kórsetken.
Sondaı-aq ár jyldary «Prezıdent kýbogynda» qazaqstandyqtardan Mıhaıl Kýkýshkın men Andreı Golýbev, ýkraınalyq Ilıa Marchenko, aýstrııalyq Sebastıan Offner, Germanııa quramasynyń qazirgi kapıtany Raıner Shattler, Aýstralııa ashyq chempıonatynyń jáne «Rolan Garros» chempıony horvat Ivan Dodıg, juptyq synda «Úlken dýlyǵa» týrnıriniń eki dúrkin jeńimpazy qytaılyq Chjan Shýaı jáne taǵy basqa tennısshiler jeńiske jetken.