Bıyl tennısten Qazaqstan quramasy tarıhta alǵash ret úsh álem chempıonatynda baq synaıdy. Atap aıtar bolsaq, tamyz, qyrkúıek jáne qarasha aılarynda ótetin jasóspirimder, erler jáne áıelder arasyndaǵy jahandyq dodada jerlesterimizge jankúıer bolamyz. Álem birinshiligin eń birinshi bolyp jasóspirimder quramasy bastap beredi.
Búgin Chehııanyń Prosteev qalasynda jalaýy jelbiregen 14 jasqa deıingi (2022 ITF World Junior Tennis Finals) tennısshiler arasyndaǵy komandalyq álem chempıonatynda Qazaqstan jasóspirimder quramasynan bólek, irikteý kezeńinde úzdik oıynymen kózge túsken taǵy 16 komanda sportshylary óner kórsetedi.
Tennıs jankúıerleriniń esinde bolsa, osy jyldyń sáýir aıynda jerlesterimiz Úndistanda ótken Azııa jáne Tynyq muhıty aımaǵynyń irikteý kezeńine qatysyp, tarıhı joldamaǵa qol jetkizgen edi. Irikteý saıystarynyń bastapqy básekelerinde otandastarymyz Indonezııa, Shrı-Lanka jáne Pákistan quramalaryn 3:0 esebimen tize búktirip, shırek fınalǵa shyqty. Al shırek fınalda Gonkong tennısshilerimen sheberlik baıqasyp, bul básekede qarsylastarynan 2:0 esebimen aılasyn asyrdy. Alaıda jartylaı fınalda otandastarymyz sátsizdikke ushyrap, Ońtústik Koreıa quramasynan úsh oıynnyń ekeýinde jeńilip qaldy – 1:2. Degenmen úshinshi oryn úshin ótken kezdesýde Qazaqstannyń jasóspirimder quramasy Taıland sportshylarynan 2:0 esebimen basym túsip, álem chempıonatynyń joldamasyn ıelengen bolatyn.
Osydan birer kún buryn tennısten Qazaqstan jasóspirimder quramasynyń kapıtany Sergeı Kvak Chehııadaǵy álemdik dodada el namysyn qorǵaıtyn tennısshilerdiń esimin jarııalady. Olar: Zańǵar Nurlanuly, Damır Jalǵasbaı jáne Danıel Tazabekov.
Osy oraıda álem chempıonatynda óner kórsetetin jas qaharmandarymyzdy jeke-jeke tanystyryp ótkendi jón sanap otyrmyz. Qazaqstan tennıs federasııasynyń baspasóz qyzmeti usynǵan málimet boıynsha, 2008 jyly dúnıege kelgen Zańǵar Nurlanuly tórt jasynan tennıstiń qyr-syryna qanyǵa bastaǵan. Almaty tennıs mektebiniń túlegi sanalatyn Zańǵar elishilik jarystarda Túrkistan oblysy atynan synǵa túsedi. Alǵashqy bapkeri – Qaırat Kósherov. Qazirgi tańda ol Bratıslavadaǵy Domınıka Sıbýlkova akademııasynda jattyǵady. Boıy – 175 sm, salmaǵy – 63 kg. Ońqaı, bekzendti qos qolmen oryndaıdy. Hard pen topyraq tósenishinde oınaǵandy jaqsy kóredi.
Damır Jalǵasbaı da tennıspen tórt jasynan bastap aınalysady. Almatydaǵy SSKA korttarynda Iýrıı Karlovtan tálim alǵan Damır búginde Alekseı Fılatovtyń basshylyǵymen Team Kazakhstan akademııasynda sheberligin shyńdap júr. Boıy – 190 sm, salmaǵy – 68 kg. Ońqaı, bekhendti qos qolmen oryndaıdy. Súıikti tósenishi – hard. Aıta keteıik, Jalǵasbaı ótken aptada Germanııanyń Vaıblıngen qalasynda uıymdastyrylǵan 14 jasqa deıingi balalar arasyndaǵy Tennis Europe sanatyna jatatyn ekinshi dárejeli týrnırdiń fınalyna deıin jetip, bas júlde úshin ótken básekede jarystyń birinshi raketkasy reseılik Sava Rybakınnen úsh sette – 7:6 (7:4), 4:6, 1:6 esebimen jeńilip qalǵan bolatyn.
Al Chehııada el namysyn qorǵaıtyn úshinshi tennısshimiz Danıel Tazabekov joǵarydaǵy eki sportshyǵa qaraǵanda karerasyn eki jyl kesh bastaǵan. Elordadaǵy Ulttyq tennıs ortalyǵynda Vladımır Oganıannyń qol astynda jattyqqan Danıel bul kúnderi Serbııa astanasy – Belgradtaǵy «Starı Koshýtnıak» tennıs kesheninde Velko Barıaktarovıchtiń qol astynda jattyǵyp júr. Boıy – 175 sm, salmaǵy – 62 kg. Solaqaı, bekhendti qos qolmen oryndaıdy. Topyraq tósenishinde oınaǵandy qolaı kóredi.
Álem birinshiligi 6 tamyzǵa deıin jalǵasady.