Kásipqoı boksshylardyń statıstıkasyn júrgizetin álemdik boxrec.com basylymynyń málimetine kóz júgirter bolsaq, búginde 200-ge jýyq otandasymyz kásibı boksshylar arasynda bási bıik tórt tujyrym boıynsha álem chempıony ataný maqsatynda sharshy alańda óner kórsetip júr. Árıne, qazirgi ýaqytta qazaqstandyq boksshylardyń ishinde orta salmaqtaǵy IBF jáne WBA Super beldikteriniń ıesi Gennadıı Golovkınniń shoqtyǵy bıik. Dese de, az ýaqytta jankúıerlerdiń kózaıymyna aınalyp, chempıondyq jekpe-jek jolynda el senimin joǵaltpaǵan, kezeń-kezeńimen tıtýldy aıqasqa jaqyndap kele jatqan birneshe órenimiz de bar.
Atap aıtar bolsaq, kásipqoı bokstaǵy alǵashqy qadamynan bastap, kúni búginge deıin qarsylastaryn qoǵadaı japyryp, el men jankúıerler senimin aqtap kele jatqan boksshylardyń qatarynda jartylaı orta salmaqtaǵy Danııar Eleýsinov (11-0, 6 KO) pen Sadrıddın Ahmedov (12-0, 10 KO), orta salmaqtaǵy Jánibek Álimhanuly (12-0, 8 KO) men Meıirim Nursultanov (17-0, 10 KO), asa aýyr salmaqtaǵy Ivan Dychko (12-0, 11 KO) jáne taǵy basqa birneshe boksshymyz bar.
Tarıhqa zer salar bolsaq, búginde qazaqstandyq boksshylardan kásipqoı boks álemindegi eń bedeldi tórt belbeý (IBF, WBA, WBO jáne WBC) boıynsha álem chempıony atanǵan tórt boksshymyz ǵana bar ekenin ańǵaramyz. 1997-2009 jyldar aralyǵynda sharshy alańda óner kórsetken «Balqash jolbarysy» osy ýaqyt aralyǵynda WBC jáne IBF tujyrymy boıynsha álem chempıony atansa, keıinnen mundaı ataqtarǵa Gennadıı Golovkın, Beıbit Shúmenov (WBA) jáne Janat Jaqııanov (WBA) qol jetkizdi.
Endi az ýaqytta joǵaryda aty atalǵan chempıondardyń qataryn bul kúnderi orta salmaqta judyryqtasyp júrgen Jánibek Álimhanuly tolyqtyrýy ǵajap emes. Bıylǵy mamyr aıynda AQSh-tyń Las-Vegas qalasynda ótken kásipqoı boks keshinde ulybrıtanııalyq Dennı Dıgnýmdy merziminen buryn jeńgen otandasymyz WBO nusqasy boıynsha orta salmaqtaǵy «ýaqytsha» álem chempıony ataǵyn jeńip aldy.
Jýyrda WBO uıymynyń basshylyǵy resmı túrde orta salmaqtaǵy WBO chempıony amerıkalyq boksshy Demetrıýs Andradege (31-0, 19 KO) 2018 jyly jeńip alǵan chempıondyq belbeýin otandasymyzǵa qarsy qorǵaýdy buıyrdy. Eger ol chempıondyq ataǵyn qandaı da bir sebeppen qorǵaýdan bas tartsa, Jánibek Álimhanuly avtomatty túrde «ýaqytsha» álem chempıonynan «tolyqqandy» álem chempıony atanady. Eki boksshyǵa jekpe-jek talaptaryn kelisýge 30 kún ýaqyt berilgen edi. Arada 10 kún ótse de, áli eki tarap kezdesý júrip jatqany týraly naqty aqparat taratpady. Degenmen áli 20 kún ýaqyt bar ekenin eskersek, jyl sońyna deıin chempıondyq jekpe-jekti kórip qalýymyz múmkin.
Álimhanulynan keıin chempıondyq ataqqa Meıirim Nursultanov ta bir taban jaqyn tur. Byltyrǵa deıin aýyr salmaqtaǵy álemniń eks-chempıony reseılik Sergeı Kovalıovti osyndaı deńgeıge kótergen promoýter Katı Dývanyń Main Events kompanııasynda bolyp, AQSh-ta jekpe-jek ótkizip júrgen Nursultanov byltyr Qazaqstanǵa oralyp, mańǵystaýlyq ADAL promoýterlik kompanııasymen kelisimshartqa otyrdy. Osy uıym aıasynda Meıirim eki aıqas ótkizip, ekeýinde de qarsylasyn merziminen buryn tize búktirdi. Qazirgi tańda Meıirim óz salmaǵynda álemdegi eń myqty TOP-10 boksshynyń qatarynda. Sondaı-aq WBC reıtınginde 8-shi, WBO boıynsha 6-orynda tur. Eger aldaǵy ýaqytta reıtıngi myqty eki-úsh boksshymen jekpe-jek ótkizse, ári qaraı chempıondyq aıqastyń da aýyly alys emes.
Sondaı-aq jartylaı orta salmaqtaǵy Danııar Eleýsinov te negizgi tórt tujyrymnyń biri boıynsha chempıondyq aıqas ótkizýge daıyn. О́kinishke qaraı, ol byltyr IBO tujyrymy boıynsha álem chempıony atanǵanymen, bul uıymnyń ataq-dańqy boksshylar arasynda da, ózge beldikter arasynda da bedelge ıe emes. Degenmen boksshynyń enshisindegi kez kelgen beldik oǵan deńgeıi joǵary qarsylastarmen judyryqtasýǵa múmkindik beretinin eskerý kerek. Eń keıingi ret byltyr jeltoqsanda sharshy alańǵa shyqqan Danııardyń kelesi jekpe-jegi qashan ótetetini belgisiz. Ol 25 shildede ýkraınalyq Ivan Golýbpen (20-1, 15 KO) judyryqtasýy tıis edi, alaıda boks keshi keıinge shegerilgendikten, bul aıqas ótpeı qaldy.
Asa aýyr salmaqtaǵy Ivan Dychko maýsym aıynda argentınalyq Kevın Espındolamen (7-4, 2 KO) kezdesip, kásipqoı bokstaǵy 12-shi jeńisine qol jetkizdi. О́z salmaǵyndaǵy álemdik reıtıngte 45-orynǵa kóterilip aldy. Al osydan birer jyl buryn qarsylastaryn birinen soń birin nokaýtpen jeńip, reıtıngte óte jyldam kóterilip kele jatqan Sadrıddın Ahmedov jaraqatyna baılanysty bir jarym jyldan beri bokstan qol úzip qaldy. Kanadada jattyǵyp, sol jaqta jekpe-jek ótkizip júrgen otandasymyz jaqynda áleýmettik jelide jattyǵýǵa qaıta kiriskenin málimdedi. Aldaǵy ýaqytta jaraqattardan aman bolyp, tez arada burynǵy qalpyna enetin bolsa, Ahmedovti de chempıondyq aıqastardyń kútip turǵany jasyryn emes.