Italııanyń bas shahary – Rımde ótken kúres túrlerinen 17 jasqa deıingi balýandar arasyndaǵy álem chempıonaty máresine jetti. Dúnıejúzilik dodada óner kórsetken Qazaqstan quramasynyń sportshylary Italııada 2 altyn, 3 qola medal jeńip aldy.
Álem chempıonatyndaǵy ekinshi altyndy el qorjynyna jarystyń sońǵy kúninde 92 kıloǵa deıingi salmaq dárejesinde beldesken Kamıl Kýrýglıev saldy. Fınalda ol majarstandyq Mýsý Arsýnkaevty 11:0 esebimen oısyrata jeńip, tuǵyrdyń eń bıik satysynan kórindi.
Aıta ketý kerek, Kamıl – balýandar áýletiniń ókili. Ol – kezinde Qazaqstan ulttyq quramasynyń sapynda birtalaı halyqaralyq jarysta óner kórsetip, álem chempıonatynyń qola medalin jeńip alǵan, Azııa oıyndarynyń birneshe dúrkin júldegeri bolǵan balýan Magomed Kýrýglıevtiń uly.
Qazaqstan quramasy sapynan Italııadaǵy básekeniń alǵashqy altynyn 55 kılo salmaqta kúresken erkin kúres sheberi Daryn Áskerbek jeńip alǵan bolatyn. Sonymen qatar jarystyń alǵashqy kúninde grek-rım kúresiniń eki ókili – Arsen Juma (48 kg) men Iýsýf Ashrapov (60 kg) jáne qyzdar kúresinen Alına Ertóstik (73 kg) qola júlde oljalaǵan edi.