Áleýmettik jeliler men messendjerlerde balalar ólimi COVID-19-ǵa qarsy egý naýqanynyń bastalýymen rekordtyq deńgeıge jetti degen aqparat taratylýda. Bul - feık, dep habarlaıdy Egemen.kz stopfake.kz saıtyna silteme jasap.
Mundaı tujyrymdy sońǵy jeti aıda satqan tabyttarynyń sany bes jyldaǵy kórsetkishke teńeskennen keıin AQSh-taǵy tabyt jasaýshy kásipker málimdegen eken.
Balalarǵa arnalǵan tabyttarǵa jappaı tapsyrys berý týraly sóz alǵash ret jalǵan aqparattyń rýpory bolatyn jáne únemi COVID-19 pandemııasyndaǵy vaksınasııa týraly feıkter taratatyn áıgili Stıý Pıters shoýynyń efırinde aıtyldy.
Balalar óliminiń artýy týraly oqıǵa jelide vırýstyq sıpatqa ıe bolǵannan keıin, ony Lead Stories portalynyń faktchekerleri joqqa shyǵardy. Olardyń maqalasynda AQSh-ta COVID-19 qarsy vaksınasııaǵa baılanysty balalar óliminiń birde-bir jaǵdaıy tirkelmegeni aıtylǵan. Biraq AQSh aýrýlardy baqylaý jáne aldyn alý ortalyǵynyń esebine sáıkes, osy jyldyń 15 shildesindegi jaǵdaı boıynsha elde 1 694 bala COVID-19-dan qaıtys bolǵan. Bul ólimniń kóp bóligi balalar men jasóspirimderge arnalǵan KVI qarsy vaksınalar maquldanǵanǵa deıin bolǵanyn atap ótken jón. Amerıkalyq tabyttar men jerleý jabdyqtary qaýymdastyǵynyń portalynda elde balalarǵa arnalǵan tabyttarǵa degen suranys kúrt ósti degen teorııany rastaıtyn derekter joq. Qaýymdastyq ókilderi de Lead Stories portalyna jaqynda balalar óliminiń kúrt óskeni týraly málimdemelerdi rastaıtyn statıstıka joq ekenin aıtqan. Balalarǵa arnalǵan tabyttarǵa suranystyń artqany týraly teorııamen birge barlyq COVID-19 qarsy vaksınalardyń quramy birdeı jáne ómirge qaýipti degen tujyrym aıtylǵan. Bul olaı emes. Ár túrli kompanııalar shyǵarǵan KVI qarsy vaksınalar bir-birinen erekshelenedi. Buǵan QR DSM Medısınalyq jáne farmasevtıkalyq baqylaý komıtetiniń resmı saıtynda jarııalanǵan preparattardyń quramymen tanysyp, ońaı kóz jetkizýge bolady. Sondaı-aq jarııalanǵan málimetterden vaksınalardyń quramynda qaýipti komponentter joq ekenin bilemiz. COVID-19 qarsy vaksınalardyń qaýipsizdigi zerthanalyq jáne klınıkalyq zertteýlermen rastalǵan. Demek taralǵan habarlama – feık.