Osydan birer kún buryn qazaqstandyq jáne reseılik BAQ betterinde fýtboldan Qazaqstan ulttyq quramasynyń bas bapkeri Magomed Adıev Reseıdiń «Ýral» komandasynyń bas bapkeri bolýy múmkin degen aqparat tarap, qazaqstandyq jankúıerlerdi alańdatyp qoıǵan edi.
Alaıda Qazaqstan fýtbol federasııasynyń baspasóz qyzmetine suhbat bergen Magomed Adıev bul aqparattyń shyndyqqa janaspaıtynyn aıtyp, ulttyq quramadaǵy qyzmetin jalǵastyra beretinin jetkizdi. «Meniń Qazaqstan fýtbol federasııasymen kelisimshartym bar, áli aıaqtalǵan joq. Alda bizdi mańyzdy eki oıyn kútip tur. Sol sebepti kelisim aıaqtalmaı, eshqaıda ketpeımin. Eshqandaı kúmán keltirýdiń qajeti joq», dedi M.Adıev.
Aıta keteıik, Qazaqstan ulttyq quramasy qyrkúıekte Ulttar lıgasy aıasynda elordada Belarýs quramasyn qabyldasa, syrt alańda Ázerbaıjan fýtbolshylarymen kezdesedi.