Tennısten Qazaqstannyń birinshi, álemniń 27-raketkasy Elena Rybakına Kanadanyń Toronto qalasynda jalaýy jelbiregen WTA 1000 týrnırin jeńispen bastady.
Qazaqstandyq tennısshi alǵashqy aınalymda álemniń 47-raketkasy chehııalyq Marııa Boýzkovamen sheberlik baıqasty. Kezdesýdiń birinshi partııasynda Rybakına basym boldy – 7:5. Ekinshi sette tarazy basy uzaq ýaqyt teńselip turdy. Tablodaǵy kórsetkish 5:5 bolǵan mezette M.Boýzkova breık jasaǵanymen (6:5), Elena 12 geımde tarazy basyn qaıta teńestirdi – 6:6. Alaıda taı-breık Boýzkovanyń paıdasyna sheshildi – 7:6 (7:3). Úshinshi, sheshýshi partııany qazaqstandyq tennısshi breıkpen bastady – 1:0. Match sońyna deıin qarqynyn bir sátke de báseńdetpegen otandasymyz 6:1 esebimen jeńiske jetti. Elena ekinshi aınalymda amerıkalyqtar Korı Gaýff nemese Medıson Brengldiń birimen kezdesedi.
Sondaı-aq Torontodaǵy týrnırge qatysyp jatqan taǵy bir jerlesimiz Iýlııa Pýtınseva da ekinshi aınalymǵa joldama aldy. Birinshi aınalymda ol dúnıejúzilik reıtıngte 299-orynda turǵan kanadalyq Ketrın Sebovpen sheberlik baıqasyp, úsh sette – 3:6, 6:2, 7:5 esebimen jeńiske jetti. Iýlııa ekinshi aınalymda ıspanııalyq Paýla Badosamen kezdesedi..