Qazaqstanda kásipqoı boksshylardyń isin júrgizetin Lucky Cent promoýterlik kompanııasy qurylatyn boldy. Bul týraly ortalyqtyń negizin qalaýshy Rýslan Zadarnovskıı málimdedi.
«Qazaqstandaǵy eń tanymal jáne nátıje berip júrgen birden-bir sporttyń túri – boks. Qazaq boks mektebiniń dańqy alysqa jaıylǵany barshaǵa málim. Bizdiń bul promoýterlik kompanııany qurýdaǵy maqsatymyz – otandyq boksshylardy tek Qazaqstanda emes, shetelderde de tanymal etý», dedi R.Zadarnovskıı.
Qazirgi tańda Lucky Cent promoýterlik quramynda elimizge tanymal, ishki chempıonattarda top jaryp, júldegerler qatarynan kórinip júrgen birqatar boksshy bar. Atap aıtar bolsaq, talaı dodada top jarǵan Rýstam Rýstamov, 49 kıloda el birinshiliginiń júldegeri Jandos Nesipjan, 2020 jyly 63 kıloda jeńiske jetken Ertýǵan Zeınýllınov, sondaı-aq Andreı Leıhner, Mıras Ertanov jáne Farýh Toqtasynov endi óz baǵyn kásipqoı boksta synap kóredi. Ortalyqtyń resmı ashylýy 25 tamyzda Almatyda ótedi.