Kanadanyń Toronto qalasynda tennısten júlde qory 2 527 250 AQSh dollaryn quraǵan WTA 1000 týrnıri aıaqtaldy. Bul jarysta elimizdiń ekinshi raketkasy Iýlııa Pýtınseva tabysty óner kórsetti.
Úzdikter tiziminde 46 orynda turǵan jerlesimiz tusaýkeser kezdesýinde jergilikti tennısshi Ketrın Sebony san soqtyryp, ekinshi kezeńde álemniń úshinshi raketkasy, ıspanııalyq Paýla Badosamen kúsh synasty. Alǵashqy sette qarsylasynan 2:4 esebimen utylyp jatqan Pýtınseva aqyrynda jeńisti áıgili qarsylasynyń ýysynan julyp áketti – 7:5. Ekinshi setti de otandasymyz sátti bastaǵan edi, Badosa jarysty jalǵastyrýdan bas tartty. Úshinshi aınalymda Iýlııa WTA tiziminde 35 orynǵa turaqtaǵan amerıkalyq Elıson Rıskeni jolynan yǵystyrdy – 6:3, 7:5. Shırek fınalda qazaqstandyq tennısshi AQSh-tyń taǵy bir ókili Djessıka Pegýlamen kezdesti. Álemniń jetinshi raketkasyna Iýlııa Pýtınsevanyń áli jetpedi – 3:6, 3:6.
Dál osy týrnırde Elena Rybakına da baq synaǵan edi. Biraq Ýımbldonda top jarǵan jerlesimizdiń Torontoda joly bolmady. Ol ekinshi kezeńde amerıkalyq Korı Gaýfftan jeńildi.