Almatynyń Túrksib aýdanynda 594 úı renovasııalaýdy qajet etedi. Bul týraly aýdan ákiminiń orynbasary Naıl Lebaev О́ńirlik kommýnıkasııalar qyzmetinde ótken brıfıngte aıtty, dep habarlaıdy Egemen.kz.
Spıkerdiń sózinshe, aldaǵy ýaqytta eki qabatty 13 eski úıdi buzý josparda tur.
«Aýdannyń kóppáterli turǵyn úı qorynda 1229 úı bar. Onyń ishinde renovasııany talap etetin eski úıler sany – 594. Qazirgi ýaqytta Saýranbaev - Spartak - Chernyshevskıı - Aqynov kósheleriniń kvadratynda 13 eski eki qabatty turǵyn úıdi, barlyǵy 201 páterdi buzý josparda tur. Atalǵan ýchaskede 856 páterli 40 bes qabatty turǵyn úı salynady», dedi Naıl Lebaev.
Sonymen qatar, ol byltyr 3 kópqabatty úıdiń (62 páter) qurylysy aıaqtalǵanyn atap ótti.
Eki qabatty úsh úı buzylyp, olardyń ornyna 7 bes qabatty úıdiń (152 páter) qurylysy bastaldy. Jumystardy 2023 jyldyń 2-toqsanynda aıaqtaý kózdelgen.
«QazaqStroy jeke ınvestorymen Seıfýllın, Kassın, Kotelnıkov kósheleriniń kvadratynda 30 segiz páterli eski úılerdi renovasııalaý bastaldy. Atalǵan ýchaskede 27 alty qabatty úı (820 páter) salynady. Qazirde 114 páterlik 2 úı salynyp, paıdalanýǵa berildi. 2021 jyly «AgroSpesStroı» merdigerlik uıymymen Osıpenko kóshesinde 59 páterli bir kóppáterli turǵyn úıdiń qurylysy bastaldy, nysandy tapsyrý merzimi – 2022 jyldyń 4-shi toqsany», dep atap ótti Naıl Lebaev О́ńirlik kommýnıkasııalar qyzmetinde ótken brıfıngte.
Sondaı-aq, Túrksib aýdanynda «TKSh modernızasııalaý» baǵdarlamasy júzege asyrylýda, 8 kópqabatty úı jóndeldi, 2017-2022 jyldar aralyǵynda 543 aýla abattandyryldy.