Astanada Qazaqstan fýtbol federasııasynyń kezekti konferensııasy ótip, onda balalar fýtboly men buqaralyq fýtboldy damytý, osy salaǵa maman daıarlaý máseleleri talqylandy. Jıynǵa Mádenıet jáne sport mınıstri Dáýren Abaev, amanat partııasynyń hatshysy Eldar Jumaǵazıev, FIFA-nyń eýropalyq ulttyq qaýymdastyqtar boıynsha dırektory Elhan Mamadov, ÝEFA prezıdentiniń ulttyq qaýymdastyqtar boıynsha keńesshisi Iozef Klıment qatysty.
Qazaqstan fýtbol federasııasynyń baspasóz qyzmeti taratqan málimet boıynsha, konferensııa delegattary jıyn barysynda 2034 jylǵa deıingi Qazaqstan fýtbolyn damytý strategııasyn bekitti.
«Búginde qazaq fýtboly júıeli reformaǵa muqtaj ekeni belgili. Aldaǵy úsh jylda negizgi kúshti kelesi mindetterdi sheshýge baǵyttaımyz. Olar: balalar-jasóspirimder jáne buqaralyq fýtboldy damytý, fýtbol mamandaryn daıyndaý salasyn jandandyrý, buqaralyq fýtbolǵa arnalǵan fýtbol ınfraqurylymyn jańǵyrtý. Maqsatymyz – jastar arasynda fýtboldy dáripteý, jarysty uıymdastyrý júıesin jaqsartý jáne fýtbol ınfraqurylymynyń jyl on eki aı qoljetimdi bolýyn qamtamasyz etý», dep atap ótti QFF prezıdenti Ádilet Barmenqulov.
Amanat partııasymen jasalǵan memorandým aıasynda elimizdiń barlyq aımaǵynda buqaralyq fýtbol men volonterlik qozǵalysty damytýǵa baǵyttalǵan 20 jastar qory qurylmaq.
«Amanat partııasy fýtboldy damytý arqyly memleket aldyndaǵy áleýmettik jáne ekonomıkalyq mindetterdi sheshýdi kózdeıdi. Fýtbol – memlekettiń salamatty ómir saltyn qalyptastyrý boıynsha mindetterin júzege asyra alatyn qural», dep atap ótti Eldar Jumaǵazıev.
Sondaı-aq jıynǵa qatysqan ÝEFA ulttyq qaýymdastyqtary boıynsha keńesshisi Iozef Klıment ÝEFA men QFF qarym-qatynastyń aıasy jyldan-jylǵa ulǵaıa bastaǵanyn, qazaqstandyq delegasııanyń ÝEFA-ǵa saparynyń joǵary mańyzǵa ıe ekenin atap ótti. Sonymen qatar ol jyldyń sońyna deıin Qazaqstan fýtbol federasııasy qyzmetkerleriniń biliktiligin arttyratyn semınar uıymdastyrýdy josparlap otyrǵanyn málimdedi.
Konferensııa qorytyndysynda Qazaqstan fýtbol federasııasynyń Atqarýshy komıtetiniń jańa quramy saılandy. Oǵan Premer-Mınıstrdiń orynbasary – Qarjy mınıstri Erulan Jamaýbaev, Mádenıet jáne sport mınıstri Dáýren Abaev, Ardagerler fýtbol odaǵynyń tóraǵasy Seıilda Baıshaqov, fýtboldan Qazaqstan áıelder quramasynyń bas bapkeriniń kómekshisi, «Oqjetpes» fýtbol klýbynyń bas bapkeri Begaıym Qyrǵyzbaeva, «Qaırat» fýtzal klýbynyń prezıdenti Qaırat Orazbekov, «Frıdom Fınans» AQ dırektorlar keńesiniń tóraǵasy Tımýr Týrlov jáne Qazaqstannyń kásipqoı fýtbol lıgasynyń úsh múshesi lıganyń quqyq belgileýshi qujattaryna sáıkes quramǵa endi.