Qazaqstan Parlamenti Senatynyń Tóraǵasy Máýlen Áshimbaev О́zbekstannyń Samarqand qalasynda ótip jatqan TMD Parlamentaralyq Assambleıasynyń 54-shi plenarlyq otyrysyna qatysty, dep habarlaıdy Egemen.kz.
Senat Spıkeri is-sharalardy joǵary deńgeıde uıymdastyrǵany úshin ózbek tarapy men TMD PAA-ǵa alǵys aıtty.
Sondaı-aq Máýlen Áshimbaev Parlamentaralyq Assambleıa alańynda saıası dıalogty nyǵaıtýǵa, saýda-ekonomıkalyq qatynastardy damytýǵa jáne elderimiz arasyndaǵy mádenı-gýmanıtarlyq baılanystardy arttyrýǵa qatysty ózekti máseleler qaralatynyn atap ótti.
«Búgingi álemdik syn-qaterlerge birlesip qarsy turý máselesi tabysty talqylanyp jatyr. Onyń bári syndarly, senimdi jáne elderimizdiń ulttyq múddelerin qurmetteı otyryp qaralady. Parlamentaralyq Assambleıa TMD keńistiginde jan-jaqty yntymaqtastyq pen dıalogty nyǵaıtýdyń mańyzdy faktory. Aldaǵy ýaqytta Assambleıany odan ári damytý – bizdiń ortaq mindetimiz», dedi Senat Tóraǵasy.
Senat Spıkeri Memleket basshysy Qasym-Jomart Toqaevtyń bastamasymen Qazaqstanda júrgizilip jatqan qoǵamdyq-saıası ózgeristerge de toqtalyp ótti.
«Kelesi aptada Qazaqstan Parlamentiniń Senaty jańartylǵan Konstıtýsııany iske asyrýǵa arnalǵan konstıtýsııalyq zańdar toptamasyn qaraıdy. Qazaqstanda júrgizilip jatqan reformalardyń negizgi maqsaty – adam quqyqtaryn qorǵaýdy nyǵaıtý jáne bılik tarmaqtary, ortalyq pen óńirler arasynda ókilettikter men jaýapkershiliktiń teńgerimin qamtamasyz etý. Iske asyrylyp jatqan barlyq reforma bizdiń elimizde azamattarymyzdyń suranystary men múddelerin eskeretin jańa saıası model qalyptastyrýdy kózdeıdi», dedi Máýlen Áshimbaev.
Senat Tóraǵasy saıası jáne ekonomıkalyq reformalardy zańnamalyq turǵydan qamtamasyz etý Qazaqstan Parlamenti Senatynyń qazirgi kezeńdegi negizgi basymdyǵy ekenin atap ótti. TMD PAA-nyń plenarlyq otyrysyna qatysýshylar Qazaqstanda júrgizilip jatqan reformalarǵa aıryqsha toqtalyp, bizdiń eldiń serpindi damýy búkil óńirdiń odan ári órkendeýi úshin zor mańyzǵa ıe ekenin tilge tıek etti.
Sonymen qatar Máýlen Áshimbaev TMD PAA alańynda múshe elderdiń Parlamentteri Palatalarynyń basshylarymen birqatar ekijaqty kezdesýler ótkizdi.
О́zbekstan Parlamenti Senatynyń Tóraıymy Tanzıla Narbaevamen kezdesýde Máýlen Áshimbaev ózbek vektory Qazaqstan Respýblıkasynyń syrtqy saıasattaǵy negizgi basymdyqtarynyń biri bolyp qala beretinin aıtty. Sondaı-aq taraptar eki eldiń parlamentaralyq yntymaqtastyǵyn nyǵaıtý máselelerin talqylady.
Qyrǵyzstan Jogorký Keneshiniń Tóraǵasy Nurlanbek Shákıevpen áńgimelesý barysynda ekonomıkalyq, mádenı-gýmanıtarlyq jáne basqa da salalardaǵy birlesken jobalardy júzege asyrý máseleleri sóz bolyp, oǵan depýtattardyń qatysý múmkindigi qaraldy. Kelesi jyly Táýelsiz Memleketter Dostastyǵyna tóraǵalyq Qazaqstannan Qyrǵyzstanǵa ótedi. Osyǵan baılanysty Máýlen Áshimbaev baýyrlas eldiń basshylyǵyna atalǵan halyqaralyq uıymǵa tabysty jáne jemisti tóraǵalyq etýge tilektestigin jetkizdi.
Máýlen Áshimbaev pen Tájikstannyń Olı Madjlısi namoıandagon Madjlısiniń Tóraǵasy Mahmadtoır Zokırzoda arasyndaǵy kezdesýde Qazaqstan men Tájikstan parlamentshileriniń yntymaqtastyǵyn odan ári arttyrý perspektıvalary áńgimege arqaý boldy. Qazaqstan Parlamenti Senatynyń Spıkeri áriptesterin naqtylyq pen praktıkalyq mazmunǵa basa mán bere otyryp, ózara is-qımyldy kúsheıtý baǵytynda birlesip jumys isteýge shaqyrdy.
Atalǵan kezdesýlerde kelesi jyly Ortalyq Azııa elderiniń birinshi Parlamentaralyq forýmyn ótkizý máselesi de talqylandy. Bul bastamany júzege asyrý týraly ýaǵdalastyqqa bıyl Qyrǵyzstannyń Cholpon-ata qalasynda ótken Ortalyq Azııa memleketteri basshylarynyń konsýltatıvtik kezdesýinde qol jetkizildi. Máýlen Áshimbaevtyń aıtýynsha, forýmdy ótkizý Ortalyq Azııa elderiniń eleýli saıası, ekonomıkalyq jáne mádenı áleýetin iske asyrýǵa yqpal etedi.
Reseı Federaldy Jınalysy Federasııa Keńesiniń Tóraıymy Valentına Matvıenkomen kezdesýde parlamentshilerdiń óńiraralyq jáne gýmanıtarlyq yntymaqtastyqty nyǵaıtý jónindegi ózara is-áreketteri qozǵaldy.