Jylytý maýsymynyń bastalǵany keshe ǵana sekildi edi, alaıda gazdan ýlaný derekteri birinen soń biri tirkelip jatyr. Máselen, Jambyl oblysynda aınaldyrǵan bir aıdyń ishinde osyndaı 17 oqıǵa boldy. О́kinishke qaraı, sońy qaıǵyly aıaqtalǵandary da bar. «QazTransGaz Aımaq» AQ ókilderi atalǵan keleńsiz jaǵdaılardyń basym bóligi turmystyq gazdy erejege saı paıdalanbaýdan týyndaǵanyn aıtyp otyr. Sondyqtan óńirde túsindirý jumystary barynsha kúsheıtilý ústinde.
Ádettegideı jylytý maýsymy bastalysymen gaz salasy mamandarynyń jumysy da kóbeıedi. О́ıtkeni jeke sektordyń turǵyndary gazdy tutyný erejelerin durys saqtamaıdy. Máselen, kóp jaǵdaıda gaz peshi murjasynyń jaǵdaıyna mán bermeıdi. Tazalanbaǵan murja bitelip qalyp, janǵan gazdyń kózge kórinbeıtin, ıisi sezilmeıtin tútini úı ishine jaıylady. Al onyń sońy jazataıym oqıǵalarǵa dýshar eteri daýsyz. Sondyqtan «QazTranGaz Aımaq» óndiristik fılıalynyń mamandary qaýiptiń aldyn alý jumystaryn qarqyndy júrgizip jatyr.
Mamandardyń aıtýynsha, úılerdiń birinde murja bitelgen bolsa, endi birinde peshtiń aqaýy anyqtalyp jatady. Muny turǵyndardyń ózderi de moıyndap otyr. Sondyqtan olar da sala mamandarynyń kómegine júgingendi jón sanaıdy.
«Jumysty onyń qyr-syryn biletin arnaıy mamandar atqarǵany durys. О́zimizdiń qolymyzdan kelmeıdi. О́z betimizshe istegen kúnniń ózinde túrli olqylyqtar shyǵyp jatady. Munyń sońy jazataıym oqıǵalarǵa alyp keledi. О́zimiz kórip júrmiz, gaz salasynyń mamandary turǵyndarǵa gazdy tutynýdyń negizgi talaptaryn túsindiredi, eskertý jasaıdy. Osydan nátıje shyǵara bilýimiz kerek. Kemshilikter, negizinen, murja men jeldetý arnasynda kezdesetinin de jaqsy bilemiz. Biz jyl saıyn mamandarmen arnaıy kelsimshartqa otyramyz. Sonyń nátıjesinde olar oryn alǵan kemshilikterdi ózderi retteıdi», deıdi jergilikti turǵyn Núsipqalı Nurmetuly.
Resmı derekke nazar aýdarsaq, gazdy qoldaný talaptaryn saqtamaý saldarynan byltyrǵy jylytý maýsymynda 98 turǵyn ýlanǵan. Bıylǵy jaǵdaı da kóńil kónshitip otyrǵan joq. Qazirdiń ózinde 36 adam gazdan ýlanyp, onyń ishinde ekeýi baqılyq bolǵan. Sondyqtan gaz salasynyń mamandary: «Turǵyndar qaýipsizdikke basa mán berse eken», degen tilekterin jetkizdi.
«Gazdyń ıisi sezilgen jaǵdaıda turǵyndardyń eń birinshi mindeti – 104 nómiri arqyly úzdiksiz qyzmet isteıtin mekemege habarlasý. Sondaı-aq úıdiń esik-terezelerin ashyp, jeldetý qajet. Negizi, aldyn alý sharalary boıynsha árbir úıge gaz ıisin anyqtaıtyn qural ornatylýy kerek», deıdi «QazTransGaz Aımaq» AQ Jambyl óndiristik fılıaly apattyq dıspetcherlik qyzmetiniń basshysy Álıaıdar Jańabekov.
«QazTransGaz Aımaq» fılıalynyń qyzmetkerleri turǵyndardy aqparattandyrý, olardyń arasynda túsindirý jumystaryn júıeli túrde júrgizip keledi. Máselen, byltyr 200 myńnan asa túsindirme paraǵyn taratyp, áleýmettik jeli men oblystyq telearnalarǵa qaýipsizdikti saqtaý týraly beınerolıkter shyǵarǵan. Jalpy, óńirde 220 myńnan asa abonent «kógildir otyndy» qoldanady. Sala mamandary tutynýshylarǵa ózderiniń qaýipsizdigi úshin mamandandyrylǵan uıymdarmen kelisimshart jasaýdy usynady. Iаǵnı úıdegi gaz jabdyqtaryna tehnıkalyq qyzmet kórsetýdi bilikti mamanǵa senip tapsyrǵan jón.