Úkimettiń 2022 jylǵy 11 qarashadaǵy qaýlysymen Úkimet qurylymyna kiretin keıbir memlekettik organdardy vedomstvolyq nagradalarmen marapattaý qaǵıdalaryna ózgerister men tolyqtyrýlar engizildi, dep habarlaıdy Egemen.kz.
Atap aıtqanda, úsh jańa tósbelgi qosyldy:
«Úzdik sıfrlandyrýshy»Atalǵan tósbelgimen qyzmette joǵary nátıjelerge qol jetkizgen, mindetterin adal oryndaǵan, sıfrlandyrý salasynda 15 jáne odan da kóp jyl eńbek etken jumyskerler marapattalady. Sondaı-aq aıryqsha jaǵdaılarda sıfrlandyrý salasyna aıryqsha eńbek sińirgen basqa sala ókilderi de marapattalady.
«Ahmet Baıtursynuly»Bul tósbelgimen gýmanıtarlyq salanyń ókilderi, qazaq tiliniń mártebesin kóterýde shyǵarmashylyq belsendilik tanytqan tulǵalar, qazaq tilin oqytý boıynsha IT jobalardyń jetekshileri, sondaı-aq gýmanıtarlyq saladaǵy yntymaqtastyqty nyǵaıtýǵa jáne damytýǵa eleýli úles qosqan shetel azamattary marapattalady.
«Eńbek sińirgen saýdager»Úshinshi jańa tósbelgimen 10 jyl jumys ótili bar saýda salasyndaǵy qyzmetkerler jáne qyzmette joǵary nátıjelerge qol jetkizgen azamattar, sondaı-aq saýdany damytýǵa eleýli úles qosqan ózge de tulǵalar marapattalady.
Qaýly 2022 jylǵy 15 qarashadan bastap qoldanysqa engiziledi.