Prezıdent janyndaǵy Ortalyq kommýnıkasııalar qyzmetinde IIDM Avtomobıl joldary komıteti tóraǵasy, «Jol aktıvteriniń ulttyq sapa ortalyǵy» RMK bas dırektory jáne «QazAvtoJol» UK AQ Basqarma tóraǵasynyń qatysýymen brıfıng ótti, dep habarlaıdy Egemen.kz.
Jol aktıvteriniń ulttyq sapa ortalyǵynyń bas dırektory Zamır Saǵynov kásiporynnyń jumysy týraly aıtyp berdi. Osy jyly Sapa ortalyǵy jol-qurylys materıaldarynyń 29 myń úlgisinen synama alǵan. Olardyń 9 myńy respýblıkalyq jeli boıynsha bolsa, 20 myń synama jergilikti jelige tıesili. Sonyń ishinde 7,3 myń materıal synamasy nemese 24% belgilengen normatıvtik talaptarǵa sáıkes kelmeıdi. Osylaısha respýblıkalyq jeli boıynsha 13% (1 166), jergilikti jeli boıynsha 30% (6 234) sáıkessizdik anyqtaldy.
Tehnıkalyq qadaǵalaýda oryn alǵan talap buzýshylyq faktileri boıynsha óńirlik Memlekettik sáýlet qurylysy basqarmalaryna ótinishter joldanýda. 2020 jyldan beri Sapa ortalyǵynyń joldaǵan ótinishteri boıynsha 81 tehnıkalyq qadaǵalaý qyzmeti ákimshilik jaýapkershilikke tartylsa, 56 ınjenerlerdiń attestaty óz kúshin joıǵan. Sondaı-aq 4 merdiger uıym jol qurylys jumystaryn júrgizý lısenzııasynan aıyrylǵan (2020 j. – 2, 2022 j. – 2). Jalpy salynǵan aıyppul somasy - 110 mıllıon teńge.